Қозоғистон Соғлиқни сақлаш вазирлиги шахсий профилактиканинг муҳимлигини таъкидлайди
ASTANA. Kazinform - Юрак-қон томир касалликлари ҳанузгача ўлим ва ногиронликнинг асосий сабабларидан бири бўлиб қолмоқда. Бироқ хавф омилларининг кўпчилигига инсоннинг ўзи таъсир кўрсатиши мумкин. Жаҳон юрак куни муносабати билан ҚР Соғлиқни сақлаш вазирлиги профилактика чораларини эслатиб, мамлакатдаги вазият қандай ўзгараётгани ҳақида маълумот берди, деб хабар қилади Kazinform агентлиги.
Вазирликнинг маълум қилишича, асосий хавф омилларига юқори қон босими, чекиш, нотўғри овқатланиш, кам ҳаракат қилиш, ортиқча вазн ва қандли диабет киради. Шу билан бирга, ушбу омилларнинг салмоқли қисмини назорат қилиш мумкин.
Қозоғистонда сўнгги беш йил ичида қон айланиш тизими касалликларидан ўлим кўрсаткичи 35,1 фоизга, касалланиш даражаси эса қарийб 15 фоизга камайди.
Ижобий динамика 2026 йилда ҳам сақланмоқда. Олти ой якунларига кўра, ўтган йилнинг шу даври билан солиштирганда қон айланиш тизими касалликлари билан касалланиш 2,4 фоизга, артериал гипертензия 6,7 фоизга, юрак ишемик касаллиги 6,6 фоизга, инсульт ҳолатлари эса 2,3 фоизга камайган.
Мамлакатда ихтисослаштирилган марказлар тармоғи кенгайтирилмоқда, юқори технологияли операциялар сони кўпаймоқда, тез тиббий ёрдам хизмати такомиллаштирилмоқда ҳамда инфаркт ва инсультни даволашнинг замонавий протоколлари жорий этилмоқда.
Шу билан бирга, мутахассислар шахсий профилактика ҳам муҳим роль ўйнашини таъкидлайди. Қозоғистонликларга артериал қон босими ва қондаги қанд миқдорини мунтазам ўлчаш, профилактик текширувлардан ўтиш, кўпроқ ҳаракат қилиш, чекишдан воз кечиш ва мувозанатли овқатланиш тавсия этилади.
Эслатиб ўтамиз, 2025 йилда Қозоғистонда очиқ юракда 13 мингдан ортиқ операция амалга оширилган. Уларнинг асосий қисмини аортокоронар шунтлаш операциялари ташкил этган.
