Қозоғистонликлар бир йилда қанча макарон истеъмол қилади
ASTANA. Kazinform - Қозоғистонда қишлоқ аҳолиси шаҳарликларга қараганда қарийб 40 фоиз кўпроқ макарон маҳсулотлари истеъмол қилади, деб хабар беради Kazinform агентлиги Energyprom.kzга таяниб.
Макарон маҳсулотлари қозоғистонликлар рационининг муҳим қисмини ташкил этади. Шу билан бирга, қишлоқ жойларда уларнинг истеъмоли шаҳарларга нисбатан анча юқори.
2025 йил якунларига кўра, мамлакатда бир нафар аҳолига ўртача 18,3 кг макарон маҳсулотлари тўғри келган. Бу бир йил аввалги кўрсаткичдан 12,4 фоизга кўп. Шаҳарларда бу кўрсаткич 16 кг, қишлоқ жойларда эса 22,3 кгни ташкил этган. Шу тариқа, қишлоқ аҳолиси шаҳарликларга қараганда қарийб 40 фоиз кўпроқ макарон истеъмол қилган.
Шаҳар ва қишлоқ ўртасидаги тафовут сўнгги ўн йил давомида сақланиб қолмоқда. 2015 йилда бир нафар қишлоқ аҳолисига 26,2 кг, шаҳар аҳолисига эса 17,4 кг макарон маҳсулотлари тўғри келган. Бироқ умумий ҳисобда сўнгги ўн йилда макарон истеъмоли камайган: мамлакат бўйича 15,8 фоизга, шаҳарларда 8,5 фоизга, қишлоқ жойларда эса 17,7 фоизга.
Жорий йил бошида Қозоғистонда макарон маҳсулотлари истеъмоли бироз камайди. 2026 йилнинг биринчи чорагида бир нафар қозоғистонликка 4,2 кг макарон тўғри келган, бир йил аввал бу кўрсаткич 4,4 кг эди. Шаҳарларда кўрсаткич 3,8 кгдан 3,7 кгга, қишлоқ жойларда эса 5,4 кгдан 5,2 кгга камайди. Шунга қарамай, қишлоқ аҳолиси ҳануз шаҳарликларга қараганда 40,5 фоиз кўпроқ макарон истеъмол қилган.
Маҳсулотларнинг айрим турлари бўйича ҳам фарқ сезиларли. Вермишель ва спагетти истеъмоли мамлакат бўйича ўртача бир киши ҳисобига 1,6 кг даражасида қолган. Шаҳарларда бу кўрсаткич 1,3 кг, қишлоқ жойларда эса 2,2 кгни ташкил этган.
Биринчи чоракда макарон ва рожки истеъмоли бир киши ҳисобига 2,6 кгни ташкил этди (бир йил аввал — 2,7 кг). Шаҳарларда бу кўрсаткич 2,4 кг, қишлоқ жойларда эса 2,9 кг бўлган.
