Қозоғистонлик туристлар кўпроқ қайси давлатларга саёҳат қилишади
«Kazakh Tourism» миллий компанияси бошқаруви раиси ўринбосари Қайрат Садвакасовнинг таъкидлашича, коронавирус пандемиясигача, бир кишининг такрорий саёҳатларини ҳисобга олганда, йилига 10-11 миллион қозоғистонлик хорижга чиқарди.
Сайёҳлик компанияларидан бирининг бош директори Анна Загоруйконинг айтишича, кўпчилик сайёҳлар БАА, Миср ва Туркияни танлайди. Бу йўналишлар йил давомида талабга эга.
«Янги йўналишлар ҳам пайдо бўлди, масалан, Греция ва Черногория. Лекин бизникилар у ёққа асосан ёзда боришади», - дейди у.
Яна бир сайёҳлик агентлигининг савдо менежери Уля Бидайбекова ҳам қозоғистонликлар денгизга тез-тез боришни яхши кўришларини, шунинг учун улар кўпинча Миср, Туркия ва Бирлашган Араб Амирликларида дам олишларини айтди.
«Ушбу йўналишлар учун нархлар мавсумга боғлиқ. Мисол учун, баҳорда Туркияга бориш арзон. 900 минг тенгега икки киши Белекдаги «All inclusive» асосида беш юлдузли меҳмонхонани танлаши мумкин. Бу яхши нарх. Умуман олганда, Туркия йил давомида катта талабга эга. Айниқса, бу йил қишда аҳоли оқими кузатилди», - деди спикер.
Уля Бидайбекова, шунингдек, 1 июндан Греция, Черногория, Италия ва Албанияга турлар очилиши ҳақида маълум қилди. Унинг сўзларига кўра, эндиликда коронавирусга қарши эмланган сайёҳлар учун кўплаб мамлакатларнинг эшиги очиқ.
«Черногорияга борган икки одамга камида 1 миллион тенге керак бўлади. Бу нонушта бериладиган меҳмонхонада турар жой билан боғлиқ. Нархлар турар жойга боғлиқ. Агар квартира ижарага олинса, у ҳолда тур арзон бўлади – икки киши учун тахминан 850 минг тенге етарли», — деди менежер.
Бундан ташқари, Малдив ороллари, Шри-Ланка ва Таиланд ҳам энди сайёҳлар учун очиқ.
Таиланднинг Қозоғистон ва Марказий Осиё мамлакатлари бўйича туризм бошқармаси ўтган йилдан буён карантин чекловларидан сўнг бу давлат яна сайёҳларни қабул қила бошлаганини хабар қилди. Қозоғистонликлар асосан Паттая ва Пхукет оролларига боришади.
Туристик агентликлари билан ишлаш бўйича менежер Вазира Аманжолованинг таъкидлашича, сайёҳлар орасида Сейшел оролларини танлаганлар ҳам бор. Ҳинд океанидаги ушбу архипелагга Дубай орқали бориш мумкин.
«Шунингдек, биз дам олувчиларга Грузия, Малдив ороллари, Амирликлар, Туркия ва Озарбайжон каби йўналишларни таклиф қиламиз», - деди у.
Айрим сайёҳлик компаниялари қозоғистонликларга Италияни ҳам кўришни таклиф қилишади. Жорий йилнинг май ойида Алматидан Миланга тўғридан-тўғри рейс йўлга қўйилиши режалаштирилган. Эслатиб ўтамиз, 2022 йил 1 мартдан Италия Қозоғистондан сайёҳларнинг киришига қўйилган чекловларни бекор қилганди.
Муаллиф: Еламан Турисбеков
