Қозоғистонлик ўқувчилар шахмат бўйича жаҳон чемпионатида иккита медални қўлга киритди
Ҳиндистонлик «Velammal MHS Mogappair» мактаб ўқувчилари 8 учрашувнинг барчасида ғалаба қозониб, ўсмирлар гуруҳида (12 ёшгача) биринчи ўринни эгаллади. Иккинчи ўрин Украинанинг «Lviv Academic Gymnasium» жамоасига насиб этди (Львов шаҳри). Учинчи ўрин учун бешта жамоа кураш олиб борди, улардан тўрттаси Қозоғистондан. Бронза медаль соҳиблари қўшимча кўрсаткичлар бўйича аниқланди. Натижада Астана шаҳридаги Республика физика-математика мактаби ўқувчилари Аланбек Жайназаров, Амир Жукенов, Мирас Хасенов, Айсултан Анетовлар медалларга сазовор бўлди.
Катталар гуруҳида эса (18 ёшгача) Истанбулдан келган «Istanbul ENKA High School» мактаби шахматчилари турнир якунланишига бир кун қолганда олтин медални қўлга киритди.
Қозоғистонликлар чемпионатнинг сўнгги кунига қадар бор-йўғи 7-ўринни эгаллаган бўлса, сўнгги куни ғалабага ўзгача ирода кўрсатди ва натижада Алматидаги Республика физика-математика мактаби кумуш медални қўлга киритди. Уларнинг 7 ва 8-турдаги иккита ғалабаси уларга Ҳиндистон терма жамоаси билан жамоавий очколар бўйича тенглашишга ёрдам берди ва рақибларини қўшимча очколар билан ортда қолдирди. Эдгар Мамедов, Иманғали Ақилбай, Амир Иген, Зарина Нурғалиева, Алихан Даулет кумуш медаль соҳиблари қаторида. Бронза медаллари «Velammal Vidyalaya alapakkam» ва «Chennai» ҳинд мактаби ўқувчиларига топширилди.
Манғистау вилояти ҳокими Нурлан Ноғаев келгусида Ақтау шаҳрида бундай турнирлар тез-тез ўтказилишини таъкидлади.
Чемпионатнинг ёпилиш маросими Каспий денгизи соҳилидаги амфитеатрда бўлиб ўтди ва феерверклар билан якунланди.
Эслатиб ўтамиз, чемпионат 4-7 август кунлари бўлиб ўтди. Унда 53 давлатдан 400 дан ортиқ ўқувчилар иштирок этди.
Муаллиф: Индира Сатенбай
