Қозоғистондаги илк автомобиль туннели ёзда қуриб битказилади
ASTANA. Kazinform – ҚР Транспорт вазири республика жанубидаги инфратузилма оъектларида олиб борилаётган қурилиш ишларининг бориши билан танишди. Марат Қарабаевнинг Қизилўрда, Туркистон вилоятлари ва Чимкент шаҳрига хизмат сафари чоғида Шақпақ бобо довони орқали мамлакатдаги илк автомобиль туннели қурилишини якунлаш муддатлари маълум бўлди, дея хабар беради Каzinform агентлиги вазирлик матбуот хизматига таяниб.
Туннел ҳайдовчиларга қишда Шақпақ бобо довонида қор остида қолиб кетмаслик имконини беради.
– Жорий йилнинг ёз ойларида Шақпақ бобо довони орқали ўтадиган туннелни қуриб, фойдаланишга топшириш режалаштирилган. Бетон ва асфальт ётқизиш ишлари тўлиқ бажарилиб, ёритиш мосламалари ўрнатилди. Айни пайтда видеокузатув ўрнатиш ва газ қувурларини ётқизиш, вентиляция ва ёнғинга қарши ускуналарни ўрнатиш ишлари олиб борилмоқда. Йўл қўмитаси вакилларининг таъкидлашича, энг асосий ишлар бажарилди.
Марат Қарабаев республика аҳамиятига молик М-32 Самара-Чимкент автомобил йўлининг Қизилўрда-Саксовул қисмини кўздан кечирди. М-32 Самара – Чимкент автомобил йўлини реконструкция қилиш лойиҳасини амалга ошириш вазифасининг устуворлиги Давлат раҳбари томонидан ўтган йилнинг октябрь ойида Қизилўрда вилоятига амалий ташрифи чоғида белгилаб берилган эди. Қизилўрдадан Саксовулгача бўлган реконструкция қилиш режалаштирилган қисми 463 кмни ташкил этади.
