Қозоғистонда ёқилғи нархи қачон ошиши мумкин
ALMATY. Kazinform - Алмати шаҳрида халқаро KIOGE конференцияси бўлиб ўтди. Тадбирда иштирок этган ҚР Энергетика вазири Алмасадам Сатқалиев келгусида Қозоғистонда ёқилғи нархи кескин ошмаслигини айтди.
Вазирнинг таъкидлашича, ҳозирда бензин захираси қарийб 22 кунга, дизель ёқилғиси эса 35 кунга етади. У ёқилғи захиралари қишлоқ хўжалигида ўрим-йиғим кампанияси ва Атирау нефтни қайта ишлаш заводида режалаштирилган таъмирлаш ишларини ҳисобга олган ҳолда шакллантирилганини таъкидлади.
“Маҳсулотларимизни чегарадан ноқонуний кесиб ўтиш жараёни тезлашаётганини сезамиз. Ички бозор ва қўшни давлатлар нархлари ўртасида сезиларли фарқ бор. Биз ички бозорнинг барқарор таъминотига салбий таъсир кўрсатаётганини кўряпмиз”, - деди вазир.
Вазир, шунингдек, ёқилғи нархини кескин ошириш режаси йўқлигини айтди. Чунки ҳукумат ижтимоий масъулиятли ёндашувга амал қилади. Бироқ у режалаштирилган нарх ошиши кутилаётганини инкор этмади.
“Биринчи навбатда, аҳолининг ижтимоий ҳимояга муҳтож қатламлари учун коммунал хизматлар нархининг ошишини, жумладан, газ ва нефть маҳсулотларини етказиб бериш билан боғлиқ дастлабки эҳтиёжларни қоплаш имконини берувчи ижтимоий ёрдам ва ижтимоий ҳамён дастурларини ишга тушириш режалаштирилган. Мазкур механизм ишлаб чиқилгач, нархларни ошириш Ҳукумат дастурига мувофиқ, Миллий банк ва Ҳукумат томонидан белгиланган инфляция коридори кўрсаткичлари бўйича бир хилда амалга оширилади”, - деди Алмасадам Сатқалиев.
