Қозоғистонда йил охиригача 165 та мактаб фойдаланишга топширилади – Таълим-маориф вазири ўринбосари
Жорий йилда 165 та янги мактаб йил охиригача фойдаланишга топширилади. Бу ҳақда ҚР Таълим-маориф вазири ўринбосари Едил Оспан маълум қилди, дея хабар беради Kazinform агентлиги мухбири.
“Ҳар йили Ҳукумат томонидан мактабларни қуриш ва модернизация қилиш учун маблағ ажратилади. Масалан, сўнгги 3 йилда 340 минг ўқувчига мўлжалланган 626 та мактаб фойдаланишга топширилди. Жорий йил охиригача 137 минг 700 ўқувчига мўлжалланган 165 та мактабни фойдаланишга топширишни режалаштирганмиз. Булар Таълим инфратузилмасини қўллаб-қувватлаш жамғармаси, республика ва маҳаллий бюджетлар, ижтимоий дастурлар ва хусусий инвесторлар маблағлари ҳисобидан барпо этилаётган объектлардир”, — деди вазир ўринбосари “Самрук-Қазна” жамғармаси матбуот хизматида бўлиб ўтган матбуот анжуманида.
Унинг сўзларига кўра, аҳоли жон бошига молиялаштиришнинг жорий этилиши мамлакатда хусусий мактаблар очилиши динамикасига ижобий таъсир кўрсатмоқда. Сўнгги 3 йилда мамлакатда 300 дан ортиқ хусусий мактаб қурилиб, фойдаланишга топширилди.
Вазир ўринбосарининг сўзларига кўра, вазирлик томонидан миллий лойиҳани самарали амалга ошириш учун зарур бўлган барча меъёрий-ҳуқуқий база ишлаб чиқилган. Мунтазам равишда мувофиқлаштириш ишлари олиб борилиб, услубий ёрдам кўрсатилмоқда. Ушбу ишлар доирасида мактабларни мебел ва технологик корпуслар билан жиҳозлаш меъёрлари ҳамда янги мактабларда ишлаётган ходимларнинг штат жадвали ишлаб чиқилиб, «Samruk-Kazyna Construction» компаниясига лойиҳалаштириш-смета ҳужжатлари тайёрлашда фойдаланиш учун тақдим этилди.
Муаллиф: Марлан Жиембай
