Қозоғистонда йил бошидан буён сув хўжалиги ходимларининг иш ҳақи 25 фоизга ошди
ASTANА. Кazinform — Жорий йилда сув хўжалиги соҳасида 450 дан ортиқ мутахассис малака ошириш курсларидан ўтади. Бу ҳақда Қозоғистон Республикаси Сув ресурслари ва ирригация вазирлиги матбуот хизмати маълум қилди.
Вазирлик маълумотларига кўра, 2024 йилда 450 дан ортиқ сув хўжалиги ходимлари ихтисослаштирилган марказларда малака ошириш курсларидан ўтади. Бугунги кунда вазирлик томонидан сув хўжалиги мутахассисларининг малакасини ошириш қоидалари ишлаб чиқилмоқда. Шунингдек, Сув ресурслари ва ирригация вазирлиги ҳузурида сув ресурсларидан фойдаланиш ва уларни муҳофаза қилиш, сув таъминоти, дренаж ва ирригация соҳалари бўйича касбий малака ошириш юзасидан тармоқ кенгаши ташкил этилган. Кенгаш қоидалари ва касбий стандартларни долзарблаштириш бўйича иш режаси тасдиқланиб, улар асосида сув соҳаси мутахассисларини тайёрлаш юзасидан таълим дастурлари янгиланади.
“Ҳудудлардаги талабаларнинг сув хўжалиги ташкилотларида ишлаб чиқариш амалиётини ўташи ва келгусида иш билан таъминланиши учун ОТМлар билан ҳамкорлик меморандумлари тузишни режалаштирганмиз. Бундан ташқари, жорий йилдан бошлаб айрим сув хўжалиги ходимларининг иш ҳақи 25 фоизга оширилди. Бундай тадбирлар сув соҳасидаги касблар нуфузини ошириш, талабаларни магистратура ва докторантурада ўқишни давом эттиришга, соҳа мутахассисларини эса, жумладан, “Болашақ” дастури доирасида малака оширишга рағбатлантириши керак”, – деди ҚР Сув ресурслари ва ирригация вазири Нуржан Нуржигитов.
