Қозоғистонда ядровий ва радиациявий ҳодисаларга тезкор жавоб бериш маркази очилди
ASTANА. Кazinform — 2026 йил 2 октябрда Қозоғистон Республикаси Атом энергияси агентлиги ядровий ва радиациявий ҳодисаларга тезкор мониторинг ва жавоб бериш марказини очди.
Қозоғистон Республикаси Атом энергияси агентлиги матбуот хизматининг хабар беришича, Марказ Қозоғистон ва Америка Қўшма Штатлари ўртасидаги ҳамкорлик доирасида АҚШ Энергетика вазирлиги Миллий ядровий хавфсизлик бошқармаси (DOE/NNSA) кўмагида ташкил этилган.
Очилиш маросимида ҚР Атом энергияси агентлиги, Қозоғистондаги АҚШ Элчихонаси ва АҚШ Энергетика вазирлиги Миллий ядровий хавфсизлик бошқармаси вакиллари иштирок этишди.
Марказнинг асосий вазифалари — радиациявий вазиятни мониторинг ва таҳлил қилиш, операцион маълумотлар алмашиш, шунингдек, ядровий ва радиациявий ҳодисалар юз берган тақдирда ҳаракатларни мувофиқлаштиришдир.
Марказнинг иши тезкор ва асосли қарорлар қабул қилиш учун зарур бўлган ишончли маълумотларни ўз вақтида олиш имконини беради.
— Марказнинг очилиши Қозоғистоннинг миллий ядровий ва радиациявий хавфсизлик тизимини мустаҳкамлашдаги муҳим қадам ҳисобланади. Унинг фаолияти потенциал ядровий ва радиациявий ҳодисаларга жавоб беришга тайёргарликни оширишга, шунингдек, давлат органлари ва ихтисослашган ташкилотлар ўртасидаги ўзаро алоқаларни ривожлантиришга ҳисса қўшади, — дейилади хабарда.
Келажакда марказнинг техник ва таҳлилий имкониятларини ривожлантириш, идоралараро ўзаро алоқаларни яхшилаш, мутахассисларни тайёрлаш ва уларнинг малакасини ошириш, шунингдек, амалий машғулотлар ўтказиш режалаштирилган.
Эслатиб ўтамиз, Атом соҳаси ходимлари куни муносабати билан Қозоғистон Республикаси Атом энергияси агентлиги раиси Алмасадам Саткалиев ушбу соҳа фахрийлари ва ишчиларини табриклади.
