Қозоғистонда ўсимлик мойи ишлаб чиқариш 26 фоизга ошди
ASTANA. Kazinform – 2024 йилда мойли экинлар майдони 2,9 миллион гектарга етказилди. Ёғли ўсимликлар экиладиган энг катта майдонлар Шимолий Қозоғистон (умумий экин майдонларининг 23,3%), Қостанай (23%), Павлодар (12,5%), Абай (10,2%), Ақмола (9,2%) ва Шарқий Қозоғистон (7,7%) вилоятларида тўпланган, деб хабар беради ҚР Қишлоқ хўжалиги вазирлиги.
Ёғли экинлар ҳосили 3,3 миллион тоннани ташкил этди, бу 2023 йилга (2,1 миллион тонна) нисбатан 53 фоизга кўпдир. Ушбу ҳажмнинг 1,8 миллион тоннаси кунгабоқар бўлди.
Ўсимлик мойи ишлаб чиқариш ўсишда давом этяпти. Қозоғистонда йилига қарийб 4,0 миллион тонна хом ашёни қайта ишлаш қувватига эга 88 та корхона фаолият кўрсатиб келяпти. Асосан, улар Шарқий Қозоғистон, Шимолий Қозоғистон ва Абай вилоятларида тўпланган.
2024 йилда жами 753 минг тонна ўсимлик ёғи ишлаб чиқарилди, бу 2023 йилга (672,1 минг тонна) нисбатан 12 фоизга кўпдир.
2025 йил январь-февраль ойларида ишлаб чиқариш ҳажми 2024 йилнинг шу даврига нисбатан 26,7 фоизга ошиб, 124,8 минг тоннадан 158,1 минг тоннага етди. Шу жумладан кунгабоқар ёғи ишлаб чиқариш 22,4 фоизга – 113 минг тоннадан 138,2 минг тоннага ўсди.
Ўтган йили ўсимлик мойи экспорти ҳажми 582,1 минг тоннани ташкил этиб, 2023 йилга нисбатан 12 фоизга ошди. Маҳсулотлар экспорт улуши умумий экспорт ҳажмининг 42,4 фоизини ташкил этувчи Хитойда, Ўзбекистон, Тожикистон, Афғонистон, Қирғизистон, Латвия ва Туркманистонда юқори талабга эга.
Қайта ишланган маҳсулотлар экспорт салоҳиятини ошириш учун Қозоғистон Хитой билан ҳамкорликни ривожлантиришда давом этяпти. Имзоланган санитария ва фитосанитария талаблари баённомалари ёғли ўсимликларни қайта ишлаш маҳсулотларини экспорт қилиш учун қўшимча имкониятлар очяпти.
