Қозоғистонда пенсия ва нафақалар ошди

ASTANA. Kazinform – 2023 йил 1 январдан бошлаб барча турдаги пенсия ва нафақалар миқдори ошди, деб хабар беради Kazinform.

Хусусан, ушбу ўзгариш пенсия ва нафақа олувчи 4,4 миллион кишига тааллуқлидир. Бу мақсадлар учун республика бюджетида 4,6 триллион тенге кўзда тутилган.

«Базавий пенсия миқдори ҳар йили энг кам яшаш даражасининг ошиши ҳисобга олинган ҳолда, шунингдек, Давлат раҳбарининг фармойиши билан, энг кам миқдори энг кам яшаш даражасидан 54 фоиздан 60 фоизга оширилиши муносабати билан оширилди. Бирдамлик пенсия миқдори инфляция даражасидан 2 фоизга ошди. Бундан ташқари, Давлат раҳбарининг топшириғига мувофиқ, бирдамлик пенсиясини ҳисоблаш учун фойдаланиладиган даромаднинг энг юқори миқдори 46 дан 55 БҲМга (158,7 дан 189,8 минг тенгегача) оширилди», - дейилади ҚР Меҳнат ва аҳолини ижтимоий ҳимоя қилиш вазирлиги хабарида.

Шу муносабат билан бюджетдан тўланадиган пенсия тўловларининг энг кам миқдори 68,2 минг тенгедан 77,4 минг тенгега кўтарилди. Пенсияларнинг ошиши барча 2,2 миллион пенсионерларга таъсир кўрсатди.

«Энг кам яшаш минимуми ошиши муносабати билан ногиронлик ва боқувчисини йўқотганда тўланадиган нафақалар миқдори ҳам ошди. Бир ойлик ҳисоб-китоб индекси (БҲМ) миқдори ошиши муносабати билан бир қатор нафақалар миқдори яна ошди.

Масалан, эндиликда ишлайдиган ва ишламайдиган аёлларга туғиш муносабати билан тўланадиган давлат ёрдами миқдори: биринчи, иккинчи ва учинчи фарзандлар учун 38 БҲМ ёки 131 100 тенге (2022 йилда - 120 840 тенге), тўртинчи ва ундан ортиқ болага - 63 БҲМ ёки 217 350 тенге (2022 йилда - 200 340 тенге) ни ташкил қилади», - деди вазирлик.

Республика бюджетидан ишламайдиган ота-оналарга бола парвариши бўйича нафақа тўланади, унинг миқдори жорий йилдан бошлаб БҲМ ўсишини ҳисобга олган ҳолда 8,5 фоизга ошди.

Ишлаётган ота-оналар давлат ижтимоий суғурта жамғармасидан бола парвариши учун ижтимоий тўловларни оладилар. Президент фармойиши билан 2023 йилдан бошлаб бола парвариши учун тўлов муддати бир йилдан бир ярим йилгача узайтирилди.

Қозоғистонда ногирон болаларни қўллаб-қувватлаш учун улар вояга етгунга қадар махсус давлат нафақаси тўланади. Унинг миқдори 2023 йилда 56 794 тенгени (илгари 52 345 тенге) ташкил қилади.

Янги йилдан бошлаб кўп болали оилалар учун нафақа миқдори БҲМ ўсишини ҳисобга олган ҳолда оширилди: 4 болали оилалар учун - ойига 55 304 тенге (илгари 50 976 тенге), 5 болага - 69 138 тенге (илгари 63 728 тенге), 6 болага - 82 973 тенге (илгари 76 479 тенге), 7 болага - 96 807 тенге (илгари 89 231 тенге), 8 ва ундан ортиқ болага - 13 800 тенге (илгари 12 720 тенге) берилади.