Қозоғистонда олимларнинг маоши ҳар йили 20 фоизга ошади

ASTANА. Кazinform - Олимларнинг маоши ҳар йили 20 фоизга ошади. Бу ҳақда Ҳукумат раҳбари Алихан Смаилов Фан ва технологиялар бўйича миллий кенгаш йиғилишида маълум қилди, дея хабар беради Kazinform мухбири.

«Ҳукумат мамлакатимиз илм-фанини ривожлантириш бўйича тизимли чора-тадбирларни амалга оширмоқда. Олим ва мутахассислар билан биргаликда биз яқинда 2029 йилгача олий таълим ва фанни ривожлантиришнинг янги концепциясини ишлаб чиқдик ва тасдиқладик. Унинг доирасида олимлар сонини 1,5 баробарга ошириш, илмий институтларни ривожлантириш, илмий тадқиқотларни тижоратлаштириш, ёшларни илм-фанга жалб этиш ва университет илм-фанини ривожлантириш кўзда тутилган», — деди Алихан Смаилов.

Унга кўра, Давлат раҳбари топшириғига кўра, илм-фанни молиялаштириш 2020 йилдаги 89 миллиард тенгедан жорий йилда 160 миллиард тенгега оширилган. 2025 йилгача молиялаштириш ҳажмини 240 миллиард тенгега етказиш режалаштирилган. Ўтган йили олимларнинг маоши икки баравар ошди. Бу йил у 20 фоизга ошди, кейинги йилларда эса ҳар йили 20 фоизга ошади.

«Грант танлови натижаларига қарамай, базавий молиялаштириш доирасида 700 нафар олим иш ҳақи билан таъминланди. Асосий фанлар учун маблағлар грант танловидан ташқари ажратилади. Республика илмий кенгашлари қарорларининг холислиги ошди, апелляция комиссияси тузилди. Ҳар йили Қозоғистон олимлари малака ошириш учун дунёнинг етакчи илмий марказларига юборилади. Ёш олимларга 1000 тагача грант ажратилади. 2020 йилда 40 ёшгача бўлган ёш олимлар улуши 38 фоизни ташкил этган бўлса, бугунги кунда бу кўрсаткич 46 фоизга етди. Лойиҳани тижоратлаштириш улуши 27 фоизга ошди. Қозоғистон Республикаси Президенти ҳузуридаги Миллий фанлар академиясининг мақоми ошди», — деди Ҳукумат раҳбари.

Муаллиф: Марлан Жиембай