Қозоғистонда келгуси йил 1 январдан сув хўжалиги ходимларининг иш ҳақи 25 фоизга оширилади

Қозоғистонда келгуси йил 1 январдан сув хўжалиги ходимларининг иш ҳақи ўртача 25 фоизга оширилади. ҚР Сув ресурслари ва ирригация вазирлиги тегишли чора-тадбирларни ишлаб чиқмоқда, деб хабар беради Kazinform.

Бундан ташқари, Қозоғистоннинг ҳар бир вилоятида сув ресурсларини тақсимлаш ва ундан фойдаланишни назорат қилиш масалалари билан шуғулланувчи бошқармалар ташкил этилади.

“Сув хўжалигида меҳнатнинг жозибадорлигини ошириш зарур, иш ҳақини ошириш - бу борадаги муҳим қадамлардан биридир. Албатта, соҳада ишлаётган кадрларни сақлаб қолиш билан бирга, замон талабларидан келиб чиққан ҳолда янги мутахассислар тўлқинини тайёрлаш ҳам муҳим аҳамиятга эга. Вазирлик тегишли таклиф устида ишламоқда”, - деди ҚР Сув ресурслари ва ирригация вазири Нуржан Нуржигитов.