Қозоғистонда илк бор баянчилар ва аккордеончилар ўртасида жаҳон чемпионати ўтказилади
ASTANA. Kazinform – 2026 йил 23-27 август кунлари Астана шаҳрида Қозоғистон ва Марказий Осиё тарихида илк бор баянчилар ва аккордеончилар учун нуфузли «Coupe Mondiale 79» халқаро танлови бўлиб ўтади, деб хабар берди Роза Бағланова номидаги «Қазақконцерт» давлат академик концерт ташкилоти.
Танлов Қозоғистон Республикаси Маданият ва ахборот вазирлиги кўмагида Марказий концерт залида ташкил этилади. Шунингдек, шу кунларда Халқаро аккордеончилар конфедерацияси (Confédération Internationale des Accordéonistes, CIA) делегатларининг 156-конгресси ҳам бўлиб ўтади.
«Coupe Mondiale» – баян ва аккордеон санъати соҳасидаги дунёдаги энг нуфузли ва қадимий халқаро танловлардан бири ҳисобланади. Илк бор 1938 йилда ташкил этилган ушбу мусобақа бугунги кунда дунёнинг турли бурчакларидан энг яхши ижрочиларни бирлаштирадиган профессионал майдонга айланган.
Танловда халқаро даражадаги мусиқачилар ва маданият арбоблари иштирок этади. Ҳакамлар ҳайъати таркибида 21 давлатдан келган мутахассислар бўлса, иштирокчилар 16 мамлакатдан ариза топширган. Улар орасида Австралия, АҚШ, Германия, Италия, Франция, Хитой, Жанубий Корея, Буюк Британия, Туркия, Қозоғистон ва бошқа давлатлар вакиллари бор.
«Қозоғистоннинг ушбу халқаро лойиҳани ўтказиш ҳуқуқига эга бўлиши мамлакатимизнинг юксак маданий салоҳияти эътироф этилганини кўрсатади. Бу тадбир Астана шаҳрининг халқаро маданий мулоқот маркази сифатидаги мақомини мустаҳкамлайди ва Қозоғистоннинг жаҳон маданий маконидаги нуфузини ошириш имконини беради», – дейилади хабарда.
Танлов доирасида CIA президенти Мирко Патарини, вице-президентлар Ли Цзун ва Зорица Каракутовска, бош котиб Киммо Маттила, бош менежер Харли Жонс, бош элчи Кевин Фридрих ҳамда конфедерациянинг бошқа раҳбарлари Астана шаҳрига ташриф буюради.
23 августда иштирокчилар учун қуръа ташлаш маросими ўтказилади, 24 августда эса танловнинг тантанали очилиш маросими бўлиб ўтади. 25-27 август кунлари танлов эшитувлари, ижодий маҳорат дарслари, концертлар, матбуот анжумани, ғолибларни тақдирлаш ва ёпилиш маросими ўтказилади.
25 августда «Coupe Mondiale 74» халқаро танлови ғолиби, қозоғистонлик баянчи Олжас Нурлановнинг яккахон концерти режалаштирилган. 26 август куни эса «Saz & Soul» мусиқий жамоаси ва «Samǵa» квартети иштирокида «Танго» концерт дастури намойиш этилади.
Эслатиб ўтамиз, аввалроқ Астанада Марказий Осиёдаги энг йирик поп-маданият фестивали бошлангани ҳақида хабар берилган эди.
