Қозоғистонда аёл терговчилар сони ортиб бормоқда

Бугунги кунда Қозоғистондаги тезкор-тергов гуруҳларида 280 нафар аёл терговчи фаолият юритмоқда. Ушбу тажриба бутун мамлакат бўйлаб амалга оширилади. Бу ҳақда Мажилис раиси Ерлан Қошанов маълум қилди, дея хабар беради Kazinform.

“Охирги 2 йилда Президент топшириғи билан аёлларни зўравонликдан ҳимоя қилиш бўйича инспекторлар сони икки баравар кўпайди. Баъзида аёлни фақат аёл тушуниши мумкин. Шу боис аёллар ва вояга етмаганларга нисбатан зўравонлик ҳолатларини тергов қилувчи аёл терговчилар сонини кўпайтиришимиз керак”, — деди Ерлан Қошанов пойтахтда ўтказилган “Марказий Осиё мамлакатлари аёллари мулоқоти” анжуманида.

Унинг сўзларига кўра, бугунги кунда республика бўйича тезкор-тергов гуруҳида 280 нафар терговчи аёл фаолият юритмоқда.

“Қозоғистонда биринчи марта пилот режимида аёллар полиция бўлинмаси ташкил этилди, унда фақат аёллар ишлайди. Энди жабрланган аёллар участкага келиб, ўз муаммоларини бемалол айтиб, ёрдам сўрашлари мумкин. Яқин келажакда бу амалиёт бутун республика бўйлаб жорий этилади. Биз нафақат муаммонинг оқибатларини бартараф этишимиз, балки зўравонлик содир бўлишининг олдини олишимиз керак”, - деди у.

Пойтахтда “Марказий Осиё мамлакатлари аёллари мулоқоти” конференцияси бўлиб ўтмоқда.

Ушбу тадбирда Ўзбекистон, Қирғизистон, Туркманистон, Тожикистон вакиллари иштирок этмоқда.