Қозоғистонда 70 га яқин кўча ва 18 та таълим муассасаси номи ўзгартирилади

ASTANA. Кazinform - Қозоғистонда 69 та кўча ва 18 та мактабга янги номлар берилади. Бу ҳақда Маданият ва спорт ишлари вазири Асхат Оралов маълум қилди, дея хабар беради Kazinform.

Миллий музейда Парламент депутатлари, вазирликлар вакиллари, олим ва ёзувчилар иштирокида республика ономастика комиссиясининг йиғилиши бўлиб ўтди.

Йиғилишда Қозоғистон вилоятларидаги 18 та таълим муассасаси ҳамда Кўкшетау, Қосши, Степногор (Ақмола вилояти), Арис (Туркистон вилояти) ва Талдиқўрғон (Жетису вилояти) шаҳарларида 69 та кўча номини ўзгартириш масаласи муҳокама қилинди.

Йиғилиш иштирокчилари кўча номлари ҳудуднинг тарихий-географик хусусиятларини акс эттириши, ўзига хос маънога эга бўлиши керак деган фикрга келди.

Давлат раҳбари Қасим-Жомарт Тоқаев яқинда Туркистонда бўлиб ўтган Миллий қурултойнинг 2-сессиясида кимнингдир шахсий манфаати ва хоҳиш-истаклари учун таржимаи ҳоли атайлаб мифлаштирилган совет арбоблари номини турли объектларга бериш амалиётига чек қўйиш кераклигини айтди.

Президент ономастика соҳасида тартиб ўрнатиш, барча тартибларни ҳам минтақавий хусусиятларни, ҳам миллий устуворликларни ҳисобга олган ҳолда тартибга солиш бўйича топшириқ берди.

Шу мақсадда Маданият ва спорт ишлари вазирлиги томонидан атоқли ва тарихий шахсларнинг «Тарихий сиймолар» рўйхатини янгилаш ишлари олиб борилмоқда.

Шундан келиб чиқиб, объектлар ва кўчаларга янги номлар берилади.

Ҳозирда комиссияга 681 та таклиф келиб тушган.

Уларни маҳаллий ономастика комиссиялари кўриб чиқиши учун ҳокимликларга юборишга қарор қилинди.

Маданият қўмитасига услубий тавсияларга зарур ўзгартиришлар киритиш бўйича топшириқлар берилган.