Қозоғистонда 655 та бирламчи тиббий ёрдам кўрсатиш муассасаси қурилади

ASTANA. Kazinform – Қишлоқ аҳолисининг соғлиғини яхшилаш учун лойиҳа ишлаб чиқилди. Бу ҳақда Парламент Мажилисидаги Ҳукумат соати чоғида ҚР Соғлиқни сақлаш вазири Ажар Ғиният маълум қилди, деб хабар беради Kazinform мухбири.

«Давлатимиз раҳбарининг топшириғига кўра, қишлоқ аҳолиси саломатлигини мустаҳкамлаш мақсадида «Қишлоқдаги соғлиқни сақлаш тизимини модернизация қилиш» лойиҳаси ишлаб чиқилди. Лойиҳа иккита вазифани ўз ичига олади. Биринчидан, етишмаётган бирламчи тиббий-санитария ёрдами ташкилотлари, яъни тиббиёт пунктлари, тиббий поликлиникалар қуриш орқали бутун аҳоли пунктини тиббий инфратузилма билан таъминлаш. Бу, ўз навбатида, қишлоқда тиббий хизмат кўрсатиш, жумладан, профилактик кўрик, скрининг сифатини ошириш, касалликларни эрта аниқлаш ҳамда масофавий хизмат кўрсатиш, тиббий реабилитация, жумладан, уй шароитида кўрикдан ўтказишга йўналтирилган янги усулларни жорий этиш имконини беради», - деди Ажар Ғиният.

Иккинчидан, замонавий тиббий асбоб-ускуналар билан жиҳозланган 5 та асосий марказни қўшиб, замонавий кўп тармоқли туманлараро марказий шифохоналар тармоғини ташкил этиш ҳисобга олинди. Бу борада қишлоқ аҳолисига ўз вақтида тез ва ихтисослаштирилган тиббий ёрдам кўрсатишни янада ошириш имконини бермоқда.

Унинг таъкидлашича, вилоят ҳокимликлари билан ҳамкорликда 655 та тиббий-санитария бирламчи тиббий ёрдам кўрсатиш муассасаси, жумладан, 253 тиббиёт пункти, 160 амбулатория ва 242 фельдшер-акушерлик пунктларини қуриш бўйича тайёргарлик ишлари бошланган.

«Ескиз лойиҳаси, бош режа, ишчи лойиҳа ишлаб чиқилди. Лойиҳа учун ер участкалари танланмоқда», - деди вазир.

Вазир, инсульт ва кардиология, реанимация ва интенсив терапия, жарроҳлик, травматология ва реабилитация бўлимларини очиш режалаштирилганини айтди.

«Шунингдек, туман марказий шифохонасини замонавий тиббий асбоб-ускуналар (КТ, МРТ, ангиография, ультратовуш текшируви, эндоскопия, реанимация, тиббий реабилитация ускуналари) билан жиҳозлаш, капитал таъмирлаш режалаштирилган. Прогнозга кўра, лойиҳа 206,5 миллиард тенге миқдорида молиялаштиришни талаб қилади. Лойиҳанинг амалга оширилиши натижасида қишлоқ аҳолисига тиббий ёрдам кўрсатиш даражаси ошади, қишлоқ аҳолисига «олтин соат» тамойилига риоя қилган ҳолда тез тиббий ёрдам кўрсатилади», - деди вазир.

Муаллиф: Руслан Ғаббасов