Қозоғистонда 1 миллиондан ортиқ киши фрилансер бўлиб ишлайди

ASTANA. Kazinform – Қозоғистонда фрилансерларнинг ўртача сони 255,8 минг кишига етди. Фрилансерларнинг асосий қисми таълим, савдо (15 фоиздан), шунингдек, давлат бошқаруви ва ижтимоий таъминот (13 фоиз) соҳаларига тўғри келади, дея хабар бермоқда Kazinform.

Меҳнат ресурсларини ривожлантириш маркази маълумотларига кўра, 2021 йилда Қозоғистонда 1 миллиондан ортиқ киши фрилансер сифатида ишлаган. Шу билан бирга, фрилансерларнинг 78 фоизи бундай ишни ёлланма иш билан бирлаштирган.

Ўртача даромад 124 минг тенге, медианалик даромад 65 минг тенгени ташкил этди. Бу шуни кўрсатадики, ушбу шартнома бўйича оз миқдорда ҳақ тўланадиган кўплаб одамлар бор. Шу билан бирга, энг юқори даромад касбий ва илмий фаолият (ўртача даромад 211 минг тенге ва медианалик даромад – 111 минг тенге), тоғ-кон саноати (209 минг ва 149 минг тенге), ахборот ва алоқа (188 минг ва 93 минг тенге) соҳаларига тўғри келади.

Минтақалар нуқтаи назаридан, барча фрилансерларнинг тахминан 41 фоизи Алмати, Астана ва Чимкентда, унинг 22 фоизи Алматида.

«Кўпгина ташкилотлар фрилансерларни муайян лойиҳалар учун жалб қилади, бу уларга маълум кўникмаларга эга бўлган ишчиларни ёллашнинг узоқ жараёнини қисқартириш имконини беради. Бунинг ёрдамида корхона ходимлар ва инфратузилма харажатларини камайтириши мумкин. Фрилансер сифатида сиз бозордаги билим ва кўникмаларингиздан келиб чиқиб, қачон ишлашингиз, қаерда ишлашингиз, ким билан ишлашингиз ва ишингиз қанчалик қимматга тушишини ҳал қилишингиз мумкин. Бироқ, фрилансерлар кўпинча ижтимоий ҳимоя тизимидан четлаштирилади ва уларнинг одатда анъанавий иш билан таъминлаш доирасида тақдим этиладиган меҳнат ҳуқуқлари чекланади, масалан, йиллик таътиллар, касалхона таътиллари, касбий маҳоратини ошириш», - дейди марказнинг стратегия департаменти директори Улпан Шегенова.