Қозоғистон жаҳон ОАВларида: "Қора қути", янги терминал ва чўчқа гўшти экспорти
ASTANA. Kazinform - Бу ҳафта дунёнинг диққат-эътибори Қозоғистонга қаратилди, десак муболаға бўлмайди. Айниқса, Ақтау яқинидаги самолёт ҳалокати асосий янгиликлардан бирига айланди.
Оммавий ахборот воситалари, шунингдек, янги терминал, маҳаллий компания томонидан чўчқа гўшти экспорти ҳақида гапиради. Батафсил Kazinform мухбири шарҳида ўқинг.
Anadolu: самолётининг иккинчи “қора қутиси” топилди
Azerbaijan Airlines авиакомпаниясининг Бокудан Грознийга учаётган самолёти Ақтау яқинида ҳалокатга учраган. Сўнгги маълумотларга асосланиб, мутахассислар самолётда иккинчи “қора қути”ни топишди. Туркиянинг Anadolu ахборот агентлиги воқеа хронологияси ва вазият ҳақида хабар берди.
Воқеалар ривожи қуйидагича:
25 декабрь куни соат 10:43 да Ақтўбедаги туман диспетчерлик марказига Embraer 190 самолёти рейси ва Грознийдаги қўшимча аэродромга қўниши кераклиги ҳақида хабар келиб тушди. Қозоғистон ҳудудига етиб келишидан олдин самолётни бошқариш тизими “сир берди” ва “Ростов” назоратчиси Махачқала ва Бокуда об-ҳаво ёмонлашгани ҳақида огоҳлантирди ва экипаж Ақтауга бурилишга қарор қилди. Унгача Ақтаудаги барча фавқулодда хизматлар ёрдам беришга тайёр эди. Ва соат 10:53 да Ростов диспетчери йўловчилар бортида кислород баллони портлагани ва самолётдаги одамлар ҳушидан кетганини хабар қилди.
Қайд этиш жоизки, воқеа содир бўлган вақтда Қозоғистоннинг барча авиация корхоналари ва “ҚазАэроНавигация” диспетчерлари ҳамда Ақтау аэропорти ходимлари юқори профессионал маҳорат кўрсатган. Кўриниб турибдики, улар ҳақиқатан ҳам уйғун ва тез ишлаган. Самолёт Қозоғистон ҳаво чегарасига киргунга қадар ҳам фавқулодда хизматлар тайёр эди.
Самолёт экипажи икки марта қўнишга уринди. Бироқ йўналиш оғир ва баланд. Соат 11:28 атрофида самолёт билан алоқа узилиб қолган, кейин эса самолёт ерга қулаган.
Trend: Қозоғистон Алят портида терминал қуришни режалаштирмоқда
Қозоғистон 2025 йилда Озарбайжоннинг Алят портида янги терминал қуришни режалаштиряпти. Бу ҳақда ҚР Транспорт вазири Марат Қарабаев Мажилис сессиясида маълум қилди. Бу ҳақда Озарбайжон Trend ахборот агентлиги хабар берди.
Қозоғистон томони Алят порти, Москва яқинидаги Селятино, Беларуснинг Свислоч станцияси ва Тошкентда терминаллар қурилишини бошлашга тайёргарлик кўряпти. Объектлар қурилиши келгуси йилда бошланади. Янги терминалларнинг умумий қуввати йилига 1,2 миллион контейнерни ташкил этади.
“Келгусида Руминиянинг Констанца, Венгриянинг Будапешт ва Хитойнинг Урумчи шаҳарларида қўшма терминаллар ташкил этиш режалаштирилган. Бунинг натижасида ташқи терминаллар сиғими беш баробар ортади, Қозоғистон транспорт йўлаклари орқали юк ташувчи асосий давлатлардан юкларни етказиб бериш осонлашади”, — деди вазир.
ТАСС: Қозоғистон Арманистонга чўчқа гўшти экспорт қилишни бошлади
Қозоғистонлик тадбиркорлар Арманистонга чўчқа гўшти экспорт қила бошлади. Асосий етказиб берувчи EMC Agro компанияси ҳисобланади. Ҳозирда биринчи жўнатиш амалга оширилди. Маълумот ТАCC томонидан эълон қилинди.
Қишлоқ хўжалиги вазирлиги Ереванга 20 тонна музлатилган чўчқа гўшти экспорт қилинганини маълум қилди. Келгусида ҳажмни ошириш режалаштирилган.
Қайд этиш жоизки, EMC Agro учун ушбу экспорт хорижлик тадбиркорлар билан ҳамкорликдаги илк тажриба ҳисобланади. Чунки бунгача компания маҳсулотлари фақат Қозоғистонда сотилар эди.
“Биз чўчқа гўштини Грузияга экспорт қилиш бўйича ҳам музокаралар олиб бордик. Шундай кунларнинг бирида бу юртга дастлабки 20 тонна гўшт жўнатилади. Буни Қозоғистон учун катта воқеа дейиш мумкин, чунки бу бозор биз учун эндигина очиляпти. Арманистон ва Грузия биздан ҳар ой 400 тоннагача гўшт сотиб олишга тайёрлигини билдирди”, — деди компания вакиллари.
Вазирлик маълумотларига кўра, Қозоғистон компанияси Хитойга чўчқа гўшти етказиб бериш йўлини кўриб чиқяпти. EMC Agro корхонасининг ишлаб чиқариш қуввати йилига 20 минг тонна бўлиб, кунига 30 тоннагача маҳсулот ишлаб чиқариш имкониятига эга.
Муаллиф: Ерсин Шамшадин
