Қозоғистон Японияга маҳсулот экспортини кенгайтиришдан манфаатдор
Томонлар савдо-иқтисодий ҳамкорликнинг долзарб масалалари ва истиқболларини, жумладан, ўзаро товар айирбошлаш ҳажмини ошириш имкониятларини муҳокама қилдилар.
Арман Шаққалиев таъкидлаганидек, Япония Қозоғистондаги энг йирик инвесторлар ўнталигига киради. Охирги 17 йил ичида Япония сармояси 7,8 миллиард доллардан ошди.
2023 йилнинг 11 ойи якунлари бўйича ўзаро товар айирбошлаш ҳажми ўтган йилнинг мос даврига нисбатан 16,5 фоизга ўсиб, 2 миллиард долларга етди.
“Биз Қозоғистон маҳсулотлари экспортини кенгайтириш салоҳиятини кўрмоқдамиз ва 204 миллион долларлик 45 та қайта ишланган маҳсулот етказиб бериш ҳажмини янада оширишга тайёрмиз. Қозоғистонда йирик қишлоқ хўжалиги ва озиқ-овқат хабига айланиш учун барча имкониятлар мавжуд. Қишлоқ хўжалиги маҳсулотларини, айниқса, от гўштини етказиб бериш бўйича катта имкониятлар мавжуд”, – деди ҚР Савдо ва интеграция вазири.
Савдо-иқтисодий муносабатларни ривожлантириш ва мустаҳкамлаш учун Арман Шаққалиев Қозоғистоннинг «KazakhExport» компанияси ва Япониянинг экспорт-кредит агентлиги ўртасида суғурта, қайта суғурталаш ва кредит кафолати соҳасида яқин ҳамкорликни йўлга қўйишни таклиф қилди.
Учрашувда томонлар 2025 йил 13 апрелдан 13 октябргача Осака шаҳрида “Келажак жамиятини ҳаётимиз учун қуриш” мавзусида ўтказиладиган EXPO 2025 кўргазмасига тайёргарлик кўриш масаласини кўтардилар.
Қозоғистон Республикаси Савдо ва интеграция вазирининг сўзларига кўра, Қозоғистоннинг халқаро кўргазмада иштирок этиши икки давлатнинг манфаатдор компаниялари ва ишбилармон гуруҳлари ўртасида узоқ муддатли ва ўзаро манфаатли алоқаларни ўрнатишга хизмат қилмоқда.
Ўз навбатида, Япония Иқтисодиёт, савдо ва саноат вазири ўринбосари Ресукэ Кодзуки мамлакатлар ўртасидаги ишбилармонлик алоқалари янада жонланишига ишонч билдириб, бўлажак кўргазмага сифатли тайёргарлик кўриш мақсадида Қозоғистонга ёрдам кўрсатишга ваъда берди.
