Қозоғистон ва Жанубий Корея ўртасида ҳаво қатновлари кўпаяди
ALMATY. Kazinform – Қозоғистон ва Корея авиация маъмурлари Алмати шаҳрида музокаралар ўтказди.
Қозоғистон Транспорт вазирлиги Фуқаро авиацияси қўмитаси раиси Салтанат Томпиева Корея Республикаси Фуқаро авиацияси бошқармаси бош директори Йонг Коок Ким билан учрашди.
Музокаралар натижасида томонлар мамлакатлар ўртасида рухсат этилган рейсларнинг умумий сонини ҳафтасига 10 тадан 42 тагача оширишга келишиб олди.
Шунингдек, ҳафталик 40 та юк рейсларидан, жумладан, бешинчи даражадаги “ҳаво эркинлиги”дан фойдаланиш ҳуқуқини бериш бўйича келишувга эришилди.
Музокаралар давомида йўналишлар ва белгиланган ташувчилар сонига қўйилган чекловлар олиб ташланди, бу эса рақобатни кучайтириш ва мамлакатлар ўртасидаги парвозлар географиясини кенгайтириш имконини беради.
Томонлар авиаташувчиларнинг икки мамлакат пойтахтлари ўртасида тўғридан-тўғри ҳаво алоқаларини ўрнатиш ниятини қўллаб-қувватладилар.
