Қозоғистон ва Жаҳон банки ҳамкорликнинг янги стратегиясини қабул қилади
ASTANA. Kazinform - Астана шаҳрида ҚР Бош вазир ўринбосари – Миллий иқтисодиёт вазири Нурлан Байбазаров Жаҳон банки (ЖБ) ва Халқаро молия корпорацияси (IFC – Жаҳон банки гуруҳига киради) вакиллари билан учрашув ўтказди. Бу ҳақда Kazinform агентлиги вазирлик матбуот хизматига таяниб хабар берди.
Тадбирда Жаҳон банкининг Марказий Осиё бўйича минтақавий директори Татьяна Проскурякова, Жаҳон банкининг Қозоғистондаги доимий вакили Андрей Михнев, IFCнинг Қозоғистон, Қирғизистон ва Тожикистон бўйича минтақавий менежери Зафар Ҳошимов ва IFCнинг Қозоғистондаги ваколатхонаси раҳбари Екатерина Бенжамин иштирок этди.
Учрашувда томонлар ҳамкорликнинг асосий йўналишлари, илгари молиялаштирилган инвестиция лойиҳаларини амалга оширишнинг бориши ва Жаҳон банки гуруҳининг Қозоғистондаги дастурлари самарадорлигини ошириш йўлидаги тўсиқларни бартараф этиш масалаларини муҳокама қилдилар.
Нурлан Байбазаров бугунги кунда Қозоғистон ва Жаҳон банки ўртасида кенг кўламли иқтисодий масалаларни қамраб олувчи яқин алоқалар ўрнатилганини таъкидлади.
Жаҳон банки вакиллари мамлакат иқтисодий тараққиётида, жумладан, транспорт-логистика, инфратузилма, энергетика, коммунал хўжалик каби соҳаларда муҳим аҳамиятга эга бўлган янги лойиҳаларни амалга ошириш учун молиялаштиришдан манфаатдор эканликларини қайд этдилар.
Бош вазир ўринбосарининг сўзларига кўра, 2025-2030 йилларга мўлжалланган беш йиллик давр учун янги Ҳамкорлик доиравий стратегияси ҳозирда тасдиқлаш жараёнларидан ўтмоқда. Стратегия Жаҳон банкининг Қозоғистондаги фаолиятининг асосий йўналишларини белгилаб беради, масалан: давлат сектори ислоҳотларини қўллаб-қувватлаш, макроиқтисодий ва фискал барқарорлик, молия сектори, қишлоқ хўжалиги трансформацияси, рақамли ривожланиш.
– Ҳамкорлик йиллари давомида биз ўзаро манфаатли ҳамкорликни йўлга қўя олдик ва Банкнинг Қозоғистон тараққиётига қўшган ҳиссасини юқори баҳолаймиз. Биз мамлакатимизда янада инклюзив ва барқарор ривожланишга эришиш йўлида амалга оширилаётган ислоҳотларни қўллаб-қувватлашга қаратилган ҳамкорлигимизга катта аҳамият берамиз, – деди Н.Байбазаров.
