Қозоғистон ва Татаристон ўртасидаги кўп қиррали ҳамкорлик масаласи муҳокама қилинди
KAZAN. Kazinform – ҚР Парламенти Мажилиси раиси Ерлан Қошанов Россия Федерациясига расмий ташрифи доирасида Қозон шаҳрига ташриф буюриб, Татаристон Республикаси Раиси Рустам Минниханов ва Татаристон Давлат кенгаши раиси Фарид Мухаметшин билан учрашди. Бу ҳақда ҚР Парламенти Мажилиси матбуот хизмати хабар берди.
Учрашувда Ерлан Қошанов Татаристон Республикаси Раиси Рустам Миннихановга яқинда Қозон шаҳрида “Келажак ўйинлари” халқаро турнирининг тантанали очилиш маросимида иштирок этган Қозоғистон Президенти Қасим-Жомарт Тоқаевнинг самимий саломини етказди.
“Бу ҳақиқатан ҳам спорт, фан ва технологияни ўзида мужассам этган жуда ижодий ечим. Бу тажрибани турли соҳаларда амалда қўллаш катта имкониятларга йўл очади. Шу боис Президентимиз навбатдаги “Келажак ўйинлари”ни Қозоғистонда ўтказишни таклиф қилди”, – деди Мажилис спикери.
Ерлан Қошанов ҳудудлараро ҳамкорлик ҳақида гапирар экан, Татаристон Россиянинг етакчи саноат минтақаларидан бири ва Қозоғистон учун муҳим ҳамкор эканини таъкидлади. Бугунги кунда Қозоғистонда «Татнефть» (шина заводи, бутадиен ишлаб чиқариш), «ТЭМПО» (катта диаметрли вертикал қувурлари ишлаб чиқариш), “КАМАЗ” (юк автомобилларини йиғиш) ва бошқа йирик корхоналар ўз ишлаб чиқаришларини йўлга қўйган.
Томонлар, айниқса, юқори технологиялар соҳасида ҳамкорликни кенгайтириш имкониятларини муҳокама қилдилар. Мажилис спикери Президент Қасим-Жомарт Тоқаев Қозоғистонни “ IT-давлат”га айлантириш бўйича стратегик вазифа қўйганини айтди.
Ўз навбатида Рустам Минниханов Қозоғистон Президенти билан бўлган учрашувни катта иштиёқ билан эслади, қозоқ ва татар халқларининг тарихий ва маданий яқинлигини таъкидлаб, Қозоғистон ва Татаристон IT-парклари салоҳиятини бирлаштиришни таклиф қилди. Учрашув якунида Татаристон Раиси Қозоғистон раҳбариятининг жорий йилда Астана шаҳрида “Ули Дала Дубири” шиори остида ўтказиладиган Бешинчи Жаҳон кўчманчилар ўйинига таклифини миннатдорчилик билан қабул қилди.
Ташриф доирасида Мажлис раиси Татаристон Республикаси Давлат кенгаши раиси Фарид Мухаметшин билан учрашди ва Қозоғистон депутатларининг қонун ижодкорлиги ҳақида сўзлаб берди. Хусусан, янги солиқ, бюджет, қурилиш ва сув кодекслари, аҳолининг ортиқча қарз олишни қисқартириш, лудоманияга қарши кураш, аёллар ва болаларни ҳимоя қилиш тўғрисидаги қонун лойиҳаларига эътибор қаратди. Шунингдек, у ҳамкасбларини Давлат кенгашининг 30 йиллиги билан табриклаб, уларга ўз мақсадларини амалга оширишда муваффақиятлар тилади.
“Парламентлараро алоқаларни ривожлантириш, тўпланган тажриба алмашиш биз учун жуда муҳим. Депутатлар эришилган келишувларни юқори савияда амалга оширишда тўлиқ иштирок этиши керак. Бугунги кунда минтақалараро ҳамкорлик Қозоғистон-Россия муносабатларининг асосини ташкил этади. Қозоғистон ва Россия Федерациясининг 89 та субъектидан 76 таси билан бевосита савдо-иқтисодий алоқалар фаол ривожланмоқда. Улар орасида Татаристон етакчилик қилмоқда”, – деди Ерлан Қошанов.
Шу билан бирга, томонлар Қозоғистон ва Татаристон ўртасидаги маданият ва таълим соҳасидаги ҳамкорликни муҳокама қилдилар.
“Бизнинг қадриятларимиз кўп – динимиз, урф-одат ва анъаналаримиз бир, тилимиз ўхшаш. Мухтар Ауезов асарлари татар тилига таржима қилинган. Бу йил қозоқ халқ эртаклари тўплами татар тилида нашр этилади. Мамлакатимизда буюк татар шоирлари Ғабдолла Тоқай ва Мусо Жалелга ҳайкаллар ўрнатилди. Қозоғистонда Сабантой ҳар йили кенг нишонланади. Татаристон олий ўқув юртларида таҳсил олаётган қозоғистонлик талабалар бизнинг халқлар ўртасидаги олтин кўприкдир”, – деди Ерлан Қошанов.
Ўз навбатида Фарид Мухаметшин ўзаро маданий ва туристик алоқаларни мустаҳкамлашга чақирди. Шунингдек, муаммоларни ҳал этиш ва аниқ лойиҳаларни амалга оширишда парламент аъзоларининг доимий мулоқоти муҳимлигини таъкидлади.
Расмий ташриф доирасида Парламент делегацияси Қозон Кремлига ташриф буюрди. Б.Рамеев номидаги IT-парк лойиҳалари, шунингдек, IT-мутахассислар тайёрлайдиган “21 мактаб” фаолияти ва Россияда кимё саноати етакчиларидан бири «Технополис Химград» инновацион саноат парки ишлаб чиқариш майдончаси билан танишди.
