Қозоғистон ва Таиланд ўртасида савдо-иқтисодий ҳамкорлик шартномаси имзоланди

ASTANA. Kazinform - Савдо ва интеграция вазирлиги хабарига кўра, келишув икки томонлама иқтисодий алоқаларни узоқ муддатли асосда ривожлантиришга қаратилган. Қозоғистон ўзининг махсус иқтисодий зоналарига, масалан, солиқ ва божхона тўловларидан озод қилиш таклифи билан таиландлик инвесторларни жалб қилиш имкониятига эга, деб хабар беради Кazinform.

Бугун Астана шаҳрида ҚР Савдо ва интеграция вазири Арман Шаққалиев ва Таиланд Қироллиги Бош вазири ўринбосари, Савдо вазири Пхумтам Вечайячай икки давлат ўртасида савдо-иқтисодий ҳамкорлик тўғрисидаги битимни имзоладилар.

Савдо ва интеграция вазири Арман Шаққалиев Қозоғистон ва Таиланд ўртасидаги товар айирбошлаш 35,9 фоизга ўсиб, 367,7 миллион долларга етганини, Қозоғистон маҳсулотлари экспорти эса 55,3 миллион долларга етганини эслатди.

— Таиланд Қозоғистоннинг Жануби-Шарқий Осиёдаги асосий савдо шериги ҳисобланади. Биз қиймати 900 миллион доллардан ортиқ бўлган 100 дан ортиқ товар, жумладан, металлургия маҳсулотлари, кимё маҳсулотлари, қишлоқ хўжалиги ва минерал-хомашё турлари бўйича экспорт ҳажмини ошириш учун салмоқли салоҳиятни кўрмоқдамиз, – деди Арман Шаққалиев.

Ўз навбатида Қозоғистон Таиландга асал, икра, гўшт деликатеси, юқори сифатли алкогол ва бошқа товарлар етказиб беришни таклиф қилиши мумкин.

Томонлар саноат соҳасида ҳамкорлик қилиш, жумладан, қўй жунини қайта ишлаш, газлама, чарм-пойабзал ишлаб чиқариш бўйича қўшма лойиҳалар яратиш масалаларини муҳокама қилди. Қозоғистон янги сармоявий лойиҳалар учун қатор имтиёз ва преференцияларни таклиф қилди.

Қозоғистон Савдо ва интеграция вазири, шунингдек, юқори маржали товарлар савдосини кўпайтириш учун ҳаво юкларини ривожлантиришни таклиф қилди ва мамлакатлар ўртасида қулай виза режими ишбилармонлик фаоллигини оширишга ёрдам бериши кераклигини таъкидлади.

Ўз навбатида, Таиланд Бош вазири ўринбосари – Савдо вазири Пхумтам Вечайячай ўзаро савдо алоқаларини ривожлантириш ва ўзаро савдо ҳажмини ошириш механизми сифатида Таиланднинг Қозоғистон Республикасида ташқи савдони ривожлантириш бўйича ваколатхонасини очишни таклиф қилди. Шунингдек, у қозоғистонлик тадбиркорларни Таиланддаги савдо кўргазмасида иштирок этишга таклиф қилди.

- Сўнгги 5 йил ичида Таиланд ва Қозоғистоннинг умумий инвестиция ҳажми 100 миллион долларни ташкил этди, 2017 йилда Қозоғистон умумий савдо ҳажми 172 миллион долларни ташкил этган ҳолда Таиланднинг ЕОИИдаги ҳамкорлари рейтингида 2-ўринни эгаллади, — деди Таиланд Бош вазири ўринбосари – Савдо вазири.