Қозоғистон ва Словения президентлари кенгайтирилган таркибда музокаралар ўтказди

ASTANА. Кazinform - Қасим-Жомарт Тоқаев ва Наташа Пирц-Мусар икки мамлакат расмий делегациялари аъзолари иштирокида кенгайтирилган таркибда музокаралар ўтказди, деб хабар беради Ақорда матбуот хизмати.

Давлат раҳбари Словения делегациясига эҳтиром кўрсатиб, Қозоғистон Европадаги ишончли ва вақт синовидан ўтган Словения билан ўзаро манфаатли ҳамкорликни ривожлантириш тарафдори эканини тасдиқлади.

– Ташрифингиз мамлакатларимиз ўртасидаги ҳамкорликка янги суръат бағишлаши жиҳатидан жуда муҳим. Биз ҳозиргина жуда мазмунли учрашув ўтказдик, унда кўплаб мавзуларни, жумладан, халқаро вазиятга оид нозик масалаларни муҳокама қилдик. Икки томонлама ҳамкорликни ривожлантиришга содиқлигимизни яна бир бор тасдиқладик. Биз аниқ натижаларга эришиш учун бор куч-ғайратимизни ишга соламиз, — деди Қозоғистон Президенти.

Қасим-Жомарт Тоқаев икки томонлама муносабатларга янги суръат бағишлаши мумкин бўлган соҳаларни қайд этиб, Қозоғистонда словениялик бизнес учун қулай шарт-шароитлар яратиш ниятини билдирди. Бу тадбиркорлик фаолиятини тартибга солишда шаффофликни таъминлаш, сармояларни ҳимоя қилиш ва иқтисодиётни диверсификация қилиш учун мўлжалланган.

Давлат раҳбари Астана шаҳрида бўлиб ўтадиган Қозоғистон-Словения бизнес-форумига алоҳида қизиқиш билдирар экан, ушбу учрашув икки давлат ўртасидаги савдо ва сармоявий алоқаларни янада кенгайтиришини таъкидлади.

Наташа Пирц-Мусар Қасим-Жомарт Тоқаевга Астанада кўрсатган меҳмондўстлиги учун миннатдорлик билдирди

– Бу ташриф иқтисодий ҳамкорлигимизни чуқурлаштиришга хизмат қилади, деб ўйлайман. Ҳар икки давлат ҳам бу мақсадни қўллаб-қувватлайди. Ишончим комилки, бундан-да катта ютуқларга эришамиз. Бунинг учун бизда кенг имконият бор. Мамлакатларимиз ўртасидаги товар айирбошлаш йил сайин ортиб бормоқда. Айтганингиздек, Словениянинг Қозоғистон иқтисодиётига киритган сармоялари ҳажми 200 миллион долларга етди. Лекин бизнинг салоҳиятимиз бундан ҳам катта. Шу сабабдан мен билан бирга Словениянинг 25 та етакчи компаниясидан иборат йирик бизнес делегацияси Астанага келди. Мен бундан хурсандман, — деди Словения Президенти.

Томонлар савдо, сармоя, транспорт-логистика, муҳим фойдали қазилмалар, рақамлаштириш, сунъий интеллект, соғлиқни сақлаш, туризм каби истиқболли йўналишларда ҳамкорликка оид қатор масалаларни кўриб чиқдилар.

Эслатиб ўтамиз, Қозоғистон ва Словения президентлари кичик таркибда музокаралар ўтказди.