Қозоғистон ва Покистон Ҳукумат раҳбарлари савдо-иқтисодий ҳамкорликни мустаҳкамлаш масалаларини муҳокама қилдилар

ASTANА. Кazinform - Қозоғистон Республикаси Бош вазири Олжас Бектенов Шанхай ҳамкорлик ташкилотига аъзо давлатлар Ҳукумат раҳбарлари кенгаши йиғилишида иштирок этиш учун Исломободга ташриф буюрди.

Ташриф доирасида Покистон Бош вазири Шаҳбоз Шариф билан учрашув бўлиб ўтди. Икки томонлама савдо-иқтисодий ҳамкорликнинг бугунги ҳолати ва янада ривожлантириш истиқболлари, шунингдек, рақамлаштириш соҳасидаги ўзаро ҳамкорлик масалалари муҳокама қилинди.

Олжас Бектенов Давлат раҳбари Қасим-Жомарт Тоқаев Қозоғистон ва Покистон ўртасидаги иқтисодий ҳамкорлик салоҳиятига алоҳида эътибор қаратишини таъкидлади. Жорий йилнинг 8 ойи якунлари бўйича ўзаро товар айирбошлаш ҳажми 16 фоизга ошиб, қарийб 40 миллион долларни ташкил этди. Мавжуд салоҳиятни очиш мақсадида томонлар савдони диверсификация қилишни давом эттириш ниятида. Қозоғистон Покистон бозорига умумий қиймати 490 миллион доллардан ортиқ бўлган 85 турдаги товарлар етказиб бериш ҳажмини оширишга, жумладан етказиб бериладиган нефть-кимё, металлургия, кимё, фармацевтика саноати, шунингдек, озиқ-овқат саноати ва машинасозлик маҳсулотлари номенклатурасини кенгайтиришга тайёр.

Шу билан бирга, қишлоқ хўжалиги соҳасидаги ҳамкорликка ҳам эътибор қаратилди. Жорий йилнинг январь-август ойларида Қозоғистон қишлоқ хўжалиги маҳсулотларини етказиб бериш ҳажми қарийб 2 баробар ошиб, 7,7 миллион долларни ташкил этди. Қозоғистондан олиб келинган сабзавот ва дон маҳсулотлари Покистон бозорида харидоргир. Жорий йилда кутилаётган юқори ҳосилни ҳисобга олган ҳолда Қозоғистон Ҳукумати Покистонга ғалла етказиб бериш ҳажмини ҳар йили 2 миллион тоннагача оширишга тайёр.

Транзит-транспорт соҳасида темир йўл юк ташиш ҳажмининг 3 баробар ва автомобиль транспортида транзит ташиш ҳажмининг 4 баробар ортиши шароитида Ҳукумат раҳбарлари амалдаги “Қозоғистон-Ўзбекистон-Афғонистон-Покистон” мультимодал йўналишини ва “Қозоғистон-Туркманистон-Афғонистон-Покистон” янги транспорт йўлагини ривожлантириш истиқболлари муҳокама қилинди.

Икки мамлакат савдо-иқтисодий ва маданий-гуманитар муносабатларнинг барча йўналишлари бўйича ҳамкорликни кенгайтиришда давом этади.