Қозоғистон ва Мўғулистон рақамлаштириш йўналишидаги ҳамкорликни кучайтирмоқчи
ASTANA. Kazinform – Қозоғистон Рақамли ривожланиш, инновациялар ва аэрокосмик саноат вазири Жаслан Мадиев Улан-Баторга амалий ташрифи доирасида Мўғулистон рақамли ривожланиш, инновациялар ва коммуникациялар вазири жаноб Цэндийн Баатархуу билан учрашди.
Учрашувда томонлар ҳамкорликнинг асосий йўналишлари, жумладан, инновацион экотизимни ривожлантириш, стартапларни қўллаб-қувватлаш, рақамли ҳукуматни (GovTech) ривожлантириш ва аэрокосмик соҳадаги истиқболдаги имкониятларни муҳокама қилдилар.
Мадиевнинг таъкидлашича, ҳамкорлик алоқаларининг мустаҳкамланиши рақамлаштиришни ривожлантириш ва мамлакатлар ўртасида илғор технологиялар алмашинувига хизмат қилади.
Вазир мўғул стартапларининг Astana Hub акселерация дастурларида муваффақиятли иштирок этаётгани ва қозоғистонлик стартапларнинг Мўғулистон бозоридаги иштироки ортиб бораётганини, бу икки томонлама муносабатларни мустаҳкамлашда муҳим аҳамият касб этишини таъкидлади.
“Тажриба алмашиш ва стартапларни қўллаб-қувватлаш ҳар икки мамлакатда тадбиркорлик салоҳиятини оширади ва технологияларнинг ўсишига хизмат қилади”, – деди Мадиев.
Ташриф давомида вазир давлат хизматларидан фойдаланишни осонлаштириш мақсадида 2020 йилда ишга туширилган e-Mongolia платформаси билан танишди. Платформа Мўғулистон аҳолисининг 85 фоизини қамраб олган. Қозоғистонда давлат хизматларининг 90% дан ортиғидан онлайн фойдаланиш имконини берувчи eGov тизими мумкин бўлган ҳамкорлик ва тажриба алмашиш мавзусига айланди.
Мадиев Мўғулистоннинг ICT Group каби йирик IТ бозори етакчилари, жумладан йирик хусусий ахборот тизимлари оператори вакиллари билан учрашди. ICT Group Мўғулистон аҳолисининг 91% дан ортиғини қамраб олади ва сунъий интеллект, блокчейн ва мўғул тили учун тил моделини ишлаб чиқиш соҳаларида инновациялар киритмоқда.
Бундан ташқари, вазир мўғулистон стартапларини иш билан таъминлаш, профессионал сертификатлаш ва халқаро бозорга чиқиш имконини берувчи рақамли кўникмаларни ривожлантириш орқали қўллаб-қувватлайдиган Мўғулистон Миллий Ахборот Технологиялари Паркига (IT Park) ташриф буюрди.
Қозоғистон ва Мўғулистоннинг рақамлаштириш ва технологиялар соҳасидаги ҳамкорлиги барқарор ривожланиш ва халқаро майдонда етакчиликни мустаҳкамлаш учун янги имкониятлар очмоқда.
Ўзаро ҳамкорлик ҳар икки мамлакатда техник ваколатларни мустаҳкамлаш ва фуқароларнинг кундалик ҳаётига янги технологияларни самарали жорий этишга хизмат қилади.
“Мўғулистон томони Қозоғистон Республикаси электрон ҳукуматининг айрим ечимларига алоҳида қизиқиш билдирди, чунки тузилмавий жиҳатдан икки давлат параметрлари ўхшаш ва бу ечимлар Мўғулистонда ҳам талабга эга бўлиши мумкин. Шунингдек, Мўғулистон ҳукумати ҳозирда рақамли иқтисодиёт ва сунъий интеллектга алоҳида эътибор қаратмоқда, бу бизнинг мамлакатимиз учун ҳам қизиқарли бўлиши мумкин”, – деди вазир Жаслан Мадиев.
