Қозоғистон ва Мўғулистон инсоният олдида турган муаммоларни ҳал қилиш учун кучларни бирлаштириши мумкин – ҚР Президенти
ULAN-BOTUR. Кazinform – Қозоғистон Президенти Улан-Баторга давлат ташрифи доирасида Мўғулистон Давлат Буюк Хурали раиси Дашзэгвийн Амарбаясгалан билан учрашди. Бу ҳақда Ақорда матбуот хизмати хабар берди.
Давлат раҳбари Президент Ухнаагийн Хурэлсух билан давлатлараро ҳамкорликни стратегик шериклик даражасига олиб чиққан музокаралар натижаларини юқори баҳолади.
Қасим-Жомарт Тоқаев Спикерни ва бутун мўғул халқини жорий йилнинг июнь ойида бўлиб ўтган парламент сайлови муваффақиятли ўтгани билан табриклади. Президент Хуралнинг янги таркиби демократик жараёнлар ривожига салмоқли ҳисса қўшишига, Мўғулистоннинг халқаро майдондаги нуфузини оширишга хизмат қилишига ишонч билдирди.
Давлат раҳбари қонун чиқарувчи органлар ўртасидаги мулоқотни Қозоғистон-Мўғулистон муносабатларини ривожлантиришнинг муҳим платформаси деб атади ва парламентлараро алоқаларни мустаҳкамлашда депутатлик дўстлик гуруҳларининг ўрни катта эканини таъкидлади.
Президент суҳбатдошига Қозоғистондаги сиёсий ва иқтисодий ўзгаришлар ҳақида гапириб, амалга оширилаётган кенг кўламли сиёсий чора-тадбирлар адолат ва қонун устуворлиги тамойилларини қарор топтиришга хизмат қилаётганини таъкидлади.
Қасим-Жомарт Тоқаев икки мамлакат муносабатларида маданий-гуманитар ҳамкорлик алоҳида ўрин тутаётганига эътибор қаратди, шунингдек, Жаҳон ва анъанавий динлар етакчилари қурултойини қўллаб-қувватлагани учун Мўғулистон томонига миннатдорлик билдирди. Форумда Мўғулистондаги буддист ибодатхоналарининг таниқли вакиллари мунтазам қатнашиб келади.
Давлат раҳбари хабар қилганидек, келаси йили Қозоғистонда “Динлар мулоқоти: келажак йўлидаги синергия” мавзусига бағишланган VIII Қурултой бўлиб ўтади. Унинг сўзларига кўра, тинчлик ва барқарорлик тарафдори бўлган Қозоғистон ва Мўғулистон инсоният олдида турган фундаментал муаммоларни ҳал қилиш учун кучларини бирлаштира олади.
Мўғулистон Давлат Буюк Хурали раиси Қозоғистон Президентига қонун чиқарувчи органлар ўртасидаги алоқаларни ривожлантиришни ҳар томонлама қўллаб-қувватлагани учун миннатдорлик билдирди. Дашзэгвийн Амарбаясгалан парламентлараро ҳамкорликни янада мустаҳкамлаш ва икки томонлама муносабатларнинг шартномавий-ҳуқуқий базасини кенгайтириш устида ишлашга тайёр эканини тасдиқлади.
