Қозоғистон ва Мальта қайси соҳаларда ҳамкорликни оширади
ASTANА. Кazinform - Европада хавфсизлик ва ҳамкорлик ташкилоти раиси вазифасини бажарувчи – Мальта Ташқи ишлар, Европа ишлари ва савдо вазири Иан Борч илк бор Қозоғистонга расмий ташриф билан келди. Ташриф доирасида Қозоғистон Республикаси Бош вазири ўринбосари – Ташқи ишлар вазири Мурат Нуртилеу билан музокаралар ўтказди.
“Мамлакатимиз муҳим демократик ютуқларга эришди ва адолатли Қозоғистонни яратиш йўлидан бормоқда. Бугунги ташрифни Президент Қ.Toқаев бошчилигидаги туб сиёсий, ижтимоий ва иқтисодий ислоҳотларни қўллаб-қувватлашнинг ёрқин белгиси деб биламиз. Мальта Қозоғистоннинг Европа Иттифоқидаги муҳим ва ишончли ҳамкоридир. Мамлакатларимиз ўртасида дипломатик муносабатлар бундан 31 йил аввал ўрнатилган. Сўнгги пайтларда Астана ва Валлетта ўртасидаги сиёсий мулоқот жадал ривожланмоқда”, — деди Мурат Нуртилеу учрашувдан кейинги брифингда.
Қозоғистон вазири икки давлат ўртасидаги иқтисодий ва маданий-гуманитар ҳамкорлик катта истиқболга эга эканлигини таъкидлади. Ўтган йилларда Қозоғистон-Мальта ўртасидаги товар айланмаси 250 миллион долларни ташкил қилган.
“Савдо-иқтисодий салоҳиятимиздан тўлиқ фойдаланиш мақсадида биз вазир Борч билан туризм, қайта ишлаш, ер ости қидирув, денгиз логистикаси каби истиқболли тармоқларда ишларни фаоллаштиришга келишиб олдик. Биз Қозоғистон фуқаролари учун Европа Иттифоқининг виза режимини соддалаштириш масаласига алоҳида тўхталдик. Фикримизча, унинг ижобий ечими кўп қиррали муносабатларнинг фаол ривожланишига катта ҳисса қўшган бўларди”, - деди М.Нуртилеу.
Шу билан бирга, томонлар минтақавий ва глобал кун тартибидаги долзарб мавзулар юзасидан фикр алмашдилар.
“Умуман олганда, кўплаб халқаро муаммолар бўйича мамлакатларимизнинг позициялари яқин ёки ўхшаш. Бу йил биз мамлакатнинг қатор йирик халқаро ташкилотларга раислигини тақдим этдик. Хельсинки Якуний ҳужжати қабул қилинганининг 50 йиллиги арафасида Европада хавфсизлик ва ҳамкорлик ташкилотининг роли ва нуфузини ошириш йўлларини кўриб чиқдик”, — деди Қозоғистон Республикаси Ташқи ишлар вазири.
