Қозоғистон ва Қатар 1,3 миллиард долларлик лойиҳалар устида ишламоқда
ASTANА. Кazinform - Бугун Сенатнинг ялпи мажлисида “Қозоғистон Республикаси Ҳукумати ва Қатар Ҳукумати ўртасида инвестицияларни ўзаро рағбатлантириш ва ҳимоя қилиш тўғрисидаги битимни ратификатсия қилиш тўғрисида”ги қонун маъқулланди.
Битим 2022 йил 12 октябрда Астана шаҳрида имзоланган. Қонуннинг қабул қилиниши сармоявий муҳитни яхшилаш имконини беради, шунингдек, мамлакатлар ўртасидаги ўзаро манфаатли савдо-иқтисодий ҳамкорликни янада ривожлантиришга хизмат қилади.
“Қозоғистон Ҳукумати ва Қатар Ҳукумати ўртасида инвестицияларни қўллаб-қувватлаш ва ўзаро ҳимоя қилиш тўғрисидаги битим мамлакатлар ўртасида адолатли ва тенг инвестиция режимини таъминлашга қаратилган. Мазкур Битим икки давлат ўртасидаги яқин иқтисодий ҳамкорликни ошириш билан бирга, ишбилармонлик ташаббусларини рағбатлантириш ва икки давлат фаровонлигини ошириш учун қулай шарт-шароитлар яратади. Битимдан кўзланган мақсад – ҳар бир томон учун қулай шарт-шароитлар яратиш, тенг ҳуқуқлилик режимини тартибга солиш, миллий қонунчилик ва халқаро ҳуқуқ нормалари асосида хавфсизликни таъминлашдан иборат”, — деди сенатор Бибигул Жексенбай.
Унинг сўзларига кўра, кейинги йилларда Қатар билан икки томонлама савдо-иқтисодий ва сармоявий ҳамкорликни сифат жиҳатидан янги босқичга кўтариш, Давлат раҳбари ташаббусларини ҳаётга татбиқ этиш борасида муҳим ишлар амалга оширилмоқда. Айни пайтда икки мамлакат миллий компаниялари ва хусусий секторлари ўртасидаги алоқалар мустаҳкамланиб, иқтисодиётнинг турли тармоқларида қатор муҳим лойиҳалар амалга оширилмоқда.
“Айни пайтда оддий компанияларнинг инвестиция лойиҳалари рўйхатига умумий қиймати 1 миллиард 356 миллион АҚШ доллари бўлган 14 та лойиҳа киритилган. Улардан 20 миллион долларлик 3 та, 103 миллион долларлик 2 та лойиҳа амалга оширилди. Шуни инобатга олган ҳолда, ушбу қонун инвестиция ҳолатини янада яхшилаш ва икки давлат ўртасидаги ўзаро манфаатли савдо-иқтисодий ҳамкорликни ривожлантиришга хизмат қилишига ишонаман”, — деди депутат.
