Қозоғистон ва Хитой ўртасидаги визасиз режим муносабатларимизда янги саҳифа очмоқда – Алихан Смаилов

Қозоғистон ва Хитой ўртасидаги визасиз режим муносабатларимизда янги саҳифа очмоқда – Алихан Смаилов
Фото: ҚР Ҳукумати

Қозоғистон Республикаси Бош вазири Алихан Смаилов Шанхайга амалий ташрифи доирасида Хитой Халқ Республикаси Давлат кенгаши Бош вазири Ли Цян билан учрашув ўтказди, унда икки мамлакат ўртасидаги савдо-иқтисодий ҳамкорликнинг долзарб масалалари муҳокама қилинди, деб хабар беради Kazinform агентлиги Қозоғистон Республикаси Ҳукуматига таяниб.

Алихан Смаилов Қозоғистон Хитой билан дўстлик, яхши қўшничилик ва стратегик шериклик ришталарини мустаҳкамлашга алоҳида эътибор қаратишини таъкидлади.

“Икки мамлакат олий раҳбарияти ўртасидаги шахсий дўстона алоқалар ўзаро ҳамкорлигимизнинг барча жабҳаларига ижобий таъсир кўрсатмоқда. Қозоғистон Президенти Қасим-Жомарт Тоқаев ва Хитой раҳбари Си Цзиньпиннинг яқинда бўлиб ўтган музокаралари “олтин 30 йиллик”нинг навбатдаги даврида қозоқ-хитой ҳамкорлигини янги мазмун билан тўлдириш имконини берди”, – деди ҚР Бош вазири.

Хитой Қозоғистоннинг энг йирик савдо шерикларидан биридир. Жумладан, ўтган йили ўзаро товар айирбошлаш ҳажми 35 фоизга ошди ва рекорд даражадаги 24,2 миллиард долларга етди. Жорий йилда ҳам динамик ўсиш давом этмоқда: ўзаро товар айирбошлаш ҳажми яна 21 фоизга ошди. Бош вазирнинг сўзларига кўра, жорий этилган визасиз режим Қозоғистон Республикаси ва ХХР ўртасида ишбилармонлик алоқаларини рағбатлантириш, савдони соддалаштириш, ўзаро инвестициялар ҳажмини ошириш ва туризмни ривожлантиришга сезиларли ҳисса қўшади.

“Унинг 10 ноябрдан кучга кириши муносабатларимизда янги саҳифа очмоқда. Бу, айниқса, яқинлашиб келаётган “Қозоғистоннинг Хитойда туризм йили” муносабати билан долзарбдир. Ўйлайманки, бу чора фуқароларимиз саёҳатларини янада қулайроқ қилади ва алоқаларимизни янада мустаҳкамлайди”, – деди Алихан Смаилов.

Умуман олганда, у Қозоғистон Ҳукумати Хитой билан ҳамкорликни изчил ривожлантириш учун барча саъй-ҳаракатларни амалга оширишга тайёрлигини таъкидлади. Ўз навбатида, Хитой Халқ Республикаси Давлат Кенгаши Бош вазири Хитой ва Қозоғистон ўртасида самарали кўп қиррали ҳамкорлик йўлга қўйилгани, тез ўзгариб бораётган халқаро вазият синовларидан муваффақиятли ўтганини таъкидлади.

“Давлатларимиз раҳбарлари ўзаро муносабатларимизни янада ривожлантиришнинг устувор вазифалари ва йўналишларини белгилаб бердилар. Биз қозоғистонлик ҳамкасбларимиз билан ушбу олий даражадаги келишувларни амалиётга татбиқ этиш учун биргаликда саъй-ҳаракатлар қилишга тайёрмиз. Бундай ҳамкорлик халқларимиз турмуш даражасига ижобий таъсир кўрсатади”, – деди Ли Цян.

Сўнгги хабарлар
telegram