Қозоғистон ва Хитой ўртасидаги савдо алоқалари янги суръатга эга бўлади
ASTANА. Кazinform - Астана шаҳрида “Қозоғистон ва Хитой ўртасидаги савдо алоқаларини ривожлантиришга янги ёндашувлар” мавзусида экспортёрлар форуми бўлиб ўтмоқда. Тадбирда Хитойнинг Сичуань ва Хубэй провинцияларидан 120 дан ортиқ бизнес вакиллари иштирок этмоқда.
Қозоғистон Республикаси Савдо ва интеграция вазири Арман Шаққалиев ўз нутқида икки давлат президентлари ўзаро товар айирбошлаш ҳажмини 40 миллиард АҚШ долларига етказиш бўйича қисқа муддатли мақсад қўйганини таъкидлади. Шу билан бирга, ўтган йил якунларига кўра, Қозоғистоннинг савдо ҳамкорлари орасида Хитой Халқ Республикаси биринчи ўринни эгаллади.
“2023 йилда Қозоғистон ва Хитой Халқ Республикаси ўртасидаги ўзаро товар айирбошлаш ҳажми рекорд даражадаги 31,5 миллиард АҚШ долларига етди. Қозоғистон маҳсулотларининг Хитойга экспорти 12,6 фоизга ошиб, 14,7 миллиард долларни ташкил этди. Импорт 50,5 фоизга ошиб, 16,8 миллиард АҚШ долларига етди. Хитой билан ўзаро алоқалар Қозоғистон учун барқарор тараққиёт ва савдо ва сармоявий салоҳиятни жаҳон миқёсида рўёбга чиқаришнинг узоқ муддатли омилидир”, — деди А.Шаққалиев.
Маълумки, ўтган йили Қозоғистоннинг Хитой бозорига эркин экспорт қилиниши мумкин бўлган қишлоқ хўжалиги маҳсулотлари рўйхати кенгайтирилган эди.
“Биз Хитойнинг учта йирик провинциясига кирувчи Сичуань провинциясида фаол иш бошладик. Бугунги кунда Қозоғистон ва вилоят ўртасидаги товар айирбошлаш ҳажми қарийб 230 миллион долларни ташкил этади. Қозоғистон 45 миллион долларлик маҳсулот экспорт қилади. Қозоғистоннинг қирқдан ортиқ компанияси иштирокидаги савдо миссияси Хитой бозорига бўлган талаб ва Қозоғистон маҳсулотларининг экспорт салоҳияти кўламини намойиш этди. Бу провинция катта миқдорда маҳаллий нефт маҳсулотлари, ғалла маҳсулотлари, ичимликлар, қандолат маҳсулотлари ва бошқа товарларни харид қилишга тайёр”, — деди вазир.
