Қозоғистон ва Хитой ташқи сиёсат идоралари раҳбарлари музокара ўтказди

ASTANA. Kazinform – Қозоғистон Республикаси Бош вазири ўринбосари – Ташқи ишлар вазири Мурат Нуртилеу «Марказий Осиё-Хитой» форматида ташқи ишлар вазирлари 4-кенгашидаги иштироки доирасида Хитой Халқ Республикаси Ташқи ишлар вазири Цинь Ган билан музокаралар ўтказди, дея хабар беради Kazinform ҚР Ташқи ишлар вазирлиги расмий сайтига таяниб.

Хитойлик ҳамкасби билан музокаралар чоғида Қозоғистон-Хитой ҳамкорлигининг сиёсий, савдо-иқтисодий ва маданий-гуманитар соҳалардаги бугунги ҳолати ва ривожланиш истиқболлари муҳокама қилинди. Халқаро кун тартибидаги долзарб масалалар юзасидан фикр алмашилди.

Вазир М. Нуртилеу Хитой билан ҳар томонлама стратегик шериклик муносабатларини ривожлантириш Қозоғистон ташқи сиёсатидаги энг муҳим устувор йўналишлардан бири эканини таъкидлади. Бунда икки давлат ўртасидаги кўп томонлама ҳамкорликни, айниқса, савдо ва сармоявий ҳамкорликни янада кенгайтириш мақсадида юқори даражада эришилган келишувларни амалга ошириш бўйича биргаликдаги саъй-ҳаракатларни амалга ошириш зарурлиги таъкидланди.

Томонлар БМТ, ШҲТ, КХШТ, «Марказий Осиё – ХХР» формати ва бошқа кўп томонлама механизмлар доирасида мувофиқлаштириш ва яқин ҳамкорликни янада мустаҳкамлашга тайёр эканликларини билдирдилар.

Шунингдек, М. Нуртилеу Шэньси провинцияси партия қўмитасининг котиби Чжао Идэ билан учрашди. Бу ҳудуд ХХРнинг асосий транспорт-логистика марказларидан бири ҳисобланади. Музокаралар чоғида «Хитой-Европа-Хитой» трансконтинентал йўналиши бўйича самарали юк ташишни таъминлаш соҳасида ўзаро манфаатли ҳамкорликни ривожлантириш ва мустаҳкамлаш, шунингдек, ҳудудлараро ҳамкорликни йўлга қўйиш масалалари муҳокама қилинди.

Томонлар Сиань-Астана-Сиань йўналиши бўйича тўғридан-тўғри ҳаво қатнови очилганини мамнуният билан қайд этдилар, бу, шубҳасиз, икки давлат фуқаролари ва бизнес вакиллари ўртасидаги алмашинувни кенгайтиришга ижобий таъсир кўрсатади.

Фото: gov.kz