Қозоғистон ва Хитой сув соҳасида ҳамкорликни мустаҳкамлашга қаратилган ҳужжатларни имзолади
ASTANA. Kazinform – Қозоғистон Республикаси Бош вазирининг биринчи ўринбосари Роман Скляр амалий ташриф билан Хитойда бўлиб, Қозоғистон ва Хитой ўртасидаги ҳамкорлик бўйича Қозоғистон-Хитой қўмитасининг 12-йиғилишида иштирок этди, деб хабар беради ҚР Ҳукумати матбуот хизмати.
Икки мамлакат марказий давлат органлари вакиллари иштирокидаги қўмита йиғилишида тўсиқларсиз савдони ривожлантириш учун қулай шарт-шароитлар яратиш, икки давлатнинг транспорт алоқаларини мустаҳкамлаш, Қозоғистонда ишлаб чиқаришни маҳаллийлаштириш орқали қўшма инвестиция лойиҳаларини амалга ошириш, шунингдек, маданий-гуманитар ҳамкорликни кенгайтириш масалалари кўриб чиқилди.
Тадбир якунида томонлар Қозоғистон-Хитой ҳамкорлик қўмитасининг 12-йиғилиши баённомасини имзоладилар. Бундан ташқари, қўмита фаолиятини такомиллаштириш мақсадида томонлар унинг таркибига Саноат ва сармоявий ҳамкорлик бўйича мувофиқлаштирувчи қўмитани киритиш ва таълим соҳасида кичик қўмита ташкил этиш тўғрисида қарор қабул қилдилар. Томонлар, шунингдек, сув хўжалиги ва архив иши соҳасида идоралараро ҳамкорликни мустаҳкамлашга қаратилган ҳужжатларни имзоладилар.
ХХР Давлат кенгаши Бош вазири ўринбосари Дин Сюэсян билан икки томонлама музокаралар чоғида Қозоғистон Республикаси ва Хитой Халқ Республикаси ҳукуматлари ўртасидаги ҳамкорликнинг асосий йўналишлари муҳокама қилинди, савдо, сармоя, транспорт ва логистика, қишлоқ хўжалиги, энергетика, туризм соҳаларида ҳамкорликни мустаҳкамлашга алоҳида эътибор қаратилди.
Томонлар Қозоғистон ва Хитой ўртасидаги кенг кўламли масалалар бўйича ҳамкорликнинг ривожланиш динамикасини ижобий баҳоладилар. Ўтган йил якунларига кўра, ўзаро товар айирбошлаш ҳажми 43,8 миллиард долларни ташкил этди.
Ташриф доирасида Хитой компаниялари – металлургия, энергетика, машинасозлик, агросаноат комплекси соҳалари етакчилари билан ҳам қатор учрашувлар ўтказилди. Қозоғистон делегациясидан тегишли вазирликлар ва мамлакатнинг йирик корхоналари раҳбарлари иштирок этди.
Қозоғистонда кўмир кимёси, автомобилсозлик, қишлоқ хўжалиги маҳсулотларини чуқур қайта ишлаш ва қайта тикланувчи энергия манбалари соҳаларида қўшма инвестиция лойиҳаларини амалга ошириш истиқболлари муҳокама қилинди.
Бош вазирнинг биринчи ўринбосари саноатни ривожлантириш мамлакат учун муҳим устувор йўналиш эканини таъкидлади ва Хитой компанияларини Қозоғистон ишбилармон доиралари билан яқинроқ ҳамкорлик алоқаларини ўрнатишга чақирди.
Ўз навбатида, Хитойнинг етакчи компаниялари вакиллари Қозоғистонга стратегик лойиҳаларни амалга оширишда ишончли ҳамкор сифатида қизиқиш билдиришди.
