Қозоғистон ва Грузия депутатлари қонун ижодкорлиги соҳасида тажриба алмашишни кучайтиради

ASTANА. Кazinform – ҚР Мажилиси спикери Ерлан Қошанов Қозоғистонга расмий ташриф билан келган Грузия Парламенти спикери Шалва Папуашвили билан учрашди.

Бу Шалва Папуашвилининг Астанага биринчи расмий ташрифидир. Грузия Парламенти делегациясини кутиб олган Ерлан Қошанов қозоқ ва грузин халқларини яқин тарихий алоқалар ва маданий анъаналар боғлаб туришини таъкидлади. Икки давлат ўртасида дипломатик муносабатлар ўрнатилганидан буён самарали сиёсий мулоқот йўлга қўйилди.

– Қозоғистон Грузия билан ҳар томонлама ҳамкорликни янада мустаҳкамлашга катта аҳамият беради. Бугунги учрашув парламентлараро ҳамкорликни янада ривожлантириш масалаларини кенг муҳокама қилиш имконини беради. Президент Қасим-Жомарт Тоқаев ташаббуси билан мамлакатимизда кенг кўламли сиёсий ва иқтисодий ислоҳотлар амалга оширилмоқда. Ўйлайманки, ташриф давомида ушбу ўзгаришлар ҳақида кўпроқ билиб оласиз. Улар давлат ҳокимиятининг барча бўғинлари фаолиятини тўлиқ жонлантирди, жамоатчиликнинг сиёсатга дахлдорлигини оширди, - деди Мажилис спикери.

Учрашувда Ерлан Қошанов конституциявий ислоҳотлар, Президент ва Парламент сайловлари натижалари, Конституциявий Суд фаолияти ҳақида ахборот берди. Шу билан бирга, у янгиланган Мажилиснинг қонунчилик фаолияти билан таништирди.

Ўз навбатида, Грузия Парламенти раиси Қозоғистонга меҳмондўстлиги учун миннатдорчилик билдириб, ушбу расмий ташриф парламентлараро алоқалар ривожига янги суръат бағишлашига ишонч билдирди.

— Албатта, парламентларда ижройя ҳокимияти механизмлари мавжуд эмас, лекин иккита муҳим восита бор. Биринчиси, мамлакатни ривожлантириш сиёсатини белгилаш, иккинчиси, ушбу сиёсатни амалга оширишнинг ҳуқуқий асосларини яратиш. Биз, депутатлар, ҳукуматларимиз икки томонлама ҳамкорликни муваффақиятли ривожлантириш учун кўп ишларни қила оламиз, - деди Шалва Папуашвили.

Грузия делегацияси раҳбари Қозоғистон ҳудудларида сув тошқинларини тезроқ бартараф этиш истагини билдирди.

Томонлар гендер тенглиги, аёллар ва болалар ҳуқуқларини ҳимоя қилиш, бюджет ва солиқ қонунчилигини ислоҳ қилиш, архитектура ва қурилиш фаолияти каби масалалар бўйича икки мамлакат парламентлари кун тартиби ўхшашлигини таъкидладилар. Сўзга чиққанлар мазкур йўналишларда тегишли қўмиталар депутатлари ўртасида тажриба алмашишга келишиб олдилар.

— Қонунчиликни янгилаш давр талаби эканини ҳамкор сифатида жуда яхши тушунасиз. Депутатларнинг вазифаси эса турли соҳаларда бўлаётган ўзгаришларга ўз вақтида эътибор қаратишдан иборат, – деди Мажилис спикери.

Томонлар Қозоғистон ва Грузия ўртасида иқтисодиёт, агросаноат, транспорт-транзит, туризм ва маданий-гуманитар соҳалардаги ҳамкорликни кенгайтириш истиқболларини муҳокама қилдилар. Шу билан бирга, Ерлан Қошанов грузиялик ҳамкасбларни ҳамкорликни мустаҳкамлаш имконияти сифатида “Астана” халқаро молия маркази фаолияти билан танишишга таклиф қилди ва Қозоғистондаги Грузия сармоялари қонуний ҳимоя қилинишига ишонтирди.