Қозоғистон ва Эрон ўзаро савдо ҳажмини 3 миллиард долларга етказмоқчи

ASTANA. Kazinform – ҚР Бош вазири Алихан Смаилов ва Эрон қишлоқ хўжалиги вазири Сейид Жавад Садати Нежад аграр ва транспорт-логистика соҳаларидаги ҳамкорликни кенгайтириш истиқболларини муҳокама қилди, деб хабар беради Kazinform Ҳукумат расмий сайтига таяниб.

Январ-ноябр ойларида икки давлат ўртасидаги товар айирбошлаш ҳажми 20 фоиздан ортиқ ўсди ва 500 миллион долларни ташкил этди. Шу билан бирга, ўзаро савдо ҳажмини янада ошириш мақсадида Қозоғистон Эрон бозорига умумий қиймати қарийб 250 миллион доллар бўлган қўшимча 75 та товар етказиб беришга тайёр.

«Қишлоқ хўжалиги ҳозирда ривожланиш истиқболлари жуда юқори бўлган соҳадир. Ўзаро савдодаги улуши қарийб 80% ни ташкил қилади. Мамлакатларимизда АОК маҳсулотлари айланмасини 1 миллиард долларга етказиш имконияти мавжуд», — деди Алихан Смаилов.

Қозоғистон ҳукумати икки давлат раҳбарлари томонидан имзоланган умумий товар айирбошлаш ҳажмини 3 миллиард долларга етказиш бўйича мажбуриятни бажариш учун фаол ишлашга тайёр.

Шу билан бирга, Алихан Смаилов ўзаро ҳамкорликнинг асосий йўналишларидан бири транспорт ва логистика соҳаси эканлигини таъкидлади. Бу борада «Шимол-Жануб» транспорт йўлаги алоҳида аҳамиятга эга.

Ўз навбатида, Сейид Жавад Садати Нежад савдо ва юк ташиш ҳажмини ошириш учун темир йўл тармоғи ва денгиз инфратузилмасини янада ривожлантириш муҳимлигини таъкидлади ҳамда Эрон Қозоғистон бозорига цитрус маҳсулотлари ҳажмини кенгайтиришга тайёрлигини маълум қилди.

Фото: primeminister.kz