Қозоғистон ва China Transinfo Group ҳайдовчисиз транспортни ривожлантириш бўйича меморандум имзолади
ASTANA. Kazinform — Астанада бўлиб ўтган NEW SILK WAY халқаро транспорт форуми доирасида ҚР Транспорт вазирлиги ва Хитойнинг China Transinfo Group компанияси ҳайдовчисиз транспортни ривожлантириш ҳамда транспорт соҳасини рақамлаштириш бўйича ўзаро англашув меморандумини имзолади.
ҚР Транспорт вазирлиги матбуот хизматининг хабар беришича, ҳужжат ҳайдовчисиз транспорт технологиялари ва рақамли ечимларни транспорт соҳасига жорий этиш бўйича узоқ муддатли ҳамкорлик учун асос яратади.
Қозоғистон халқаро транспорт йўлакларини ривожлантириш, ташиш самарадорлигини ошириш ва мамлакатнинг транзит салоҳиятидан тўлиқ фойдаланиш мақсадида замонавий технологияларни жорий этмоқда.
“Жорий йилда Қозоғистон ва Россия «Астана — Москва» йўналиши бўйича ҳайдовчисиз юк автомобилларининг синов ҳаракатини амалга оширди. Кейинги қадамлардан бири — Хитой билан ҳамкорликда халқаро транспорт йўлакларининг айрим участкаларида шундай лойиҳани ишга тушириш имкониятини кўриб чиқиш”, — дейилади хабарда.
Бу Қозоғистон ва Хитой ўртасидаги халқаро автомобиль қатновини ривожлантириш ҳамда транспорт алоқаларини мустаҳкамлашга хизмат қилади.
