Қозоғистон ва АҚШ ўртасида тўғридан-тўғри авиақатнов йўлга қўйилиши мумкин
ASTANA. Kazinform — Монреаль шаҳрида бўлиб ўтаётган ИКАОнинг ҳаво транспорти бўйича 7-жаҳон конференцияси (ATConf/7) доирасида ҚР Транспорт вазири ўринбосари Талғат Ластаев ҳамда АҚШ делегацияси раҳбари, АҚШ Транспорт вазирининг авиация ва халқаро алоқалар бўйича ёрдамчиси Дэниел Ж. Эдвардс ўртасида учрашув бўлиб ўтди.
Музокараларнинг асосий мавзуси Қозоғистон ва АҚШ ўртасида тўғридан-тўғри авиақатновни йўлга қўйиш истиқболлари, шунингдек, фуқаро авиацияси соҳасидаги икки томонлама ҳамкорликни янада ривожлантириш масалалари бўлди.
Учрашув давомида Қозоғистон Президенти жорий йил декабрь ойида АҚШнинг Майами шаҳрида бўлиб ўтадиган G20 саммитига таклиф этилгани таъкидланди.
Айни пайтда Қозоғистон томони АҚШ Федерал авиация бошқармасининг (FAA) 1-тоифали мақомини олиш бўйича ишларни давом эттирмоқда. Сентябрь ойида америкалик экспертлар аудит ўтказиб, ижобий кўрсаткичларни қайд этган ҳолда дастлабки натижаларни тақдим этди.
Шунингдек, суҳбат давомида 2027 йил охирига қадар Қозоғистон ва АҚШ ўртасида тўғридан-тўғри авиақатновни йўлга қўйиш режалари муҳокама этилди.
“Биз Қозоғистон ва АҚШ ўртасида тўғридан-тўғри авиақатновни йўлга қўйишдан манфаатдормиз ва бу йўналишда фаол иш олиб бормоқдамиз. Мамлакатларимиз ўртасида имзоланган «Очиқ осмон» тўғрисидаги битим ушбу ташаббусни амалга ошириш учун мустаҳкам ҳуқуқий асос яратади. АҚШ авиация органлари билан конструктив ҳамкорликни юқори баҳолаймиз ва қолган тартиб-таомиллар яқин вақт ичида якунланишига умид қиламиз”, — деди Талғат Ластаев.
ҚР Фуқаро авиацияси қўмитаси маълумотларига кўра, учрашувда Қозоғистон авиакомпаниялари самолётлари паркини янгилаш масаласи ҳам кўтарилди. Жумладан, Air Astana авиакомпаниясига 2026-2027 йилларда АҚШга парвозларни амалга оширишда фойдаланиши режалаштирилаётган учта Boeing 787 Dreamliner самолётининг етказиб берилиши кутиляпти.
Бундан ташқари, 2025 йилда АҚШнинг Boeing компанияси билан умумий қиймати 15 млрд АҚШ долларига тенг бўлган 33 та ҳаво кемасини етказиб бериш бўйича келишувларга эришилган. Ушбу келишувлар жорий йил февраль ойида Қозоғистон Президентининг АҚШга амалга оширган ишчи ташрифи давомида тузилган эди.
Вазири ўринбосари тўғридан-тўғри авиақатновнинг йўлга қўйилиши Қозоғистон ва АҚШ муносабатларини ривожлантиришда муҳим босқич бўлишини таъкидлади. Бу бизнес ва туризм алоқаларини мустаҳкамлаш, тадбиркорлик учун янги имкониятлар яратиш ҳамда Марказий Осиёнинг Америка Қўшма Штатлари билан транспорт алоқаларини кенгайтиришга хизмат қилади.
Учрашув якунида томонлар тўғридан-тўғри авиақатновни йўлга қўйиш ва фуқаро авиацияси соҳасидаги ҳамкорликни янада мустаҳкамлаш учун зарур амалий масалаларни ҳал этиш борасида конструктив мулоқот ҳамда қўшма ишларни давом эттиришга тайёр эканликларини тасдиқладилар.
Эслатиб ўтамиз, аввалроқ Қозоғистон ва Мальдив ороллари ўртасидаги авиақатновлар сони икки бараварга оширилиши ҳақида хабар берилган эди.