Қозоғистон, Ўзбекистон ва Озарбайжон биргаликда Каспий денгизи остидан кабель ётқизади

TASHKENT. Kazinform – Куни кеча Тошкентда Қозоғистон, Ўзбекистон ва Озарбайжон энергетика вазирлари Каспий денгизи остидан электр кабелини ётқизиш лойиҳасини амалга ошириш бўйича меморандумни имзоладилар, дея хабар беради Kazinform агентлигининг Тошкентдаги мухбири Алихан Асқар.

Ҳужжатга кўра, қайд этилган уч давлат қуёш, шамол ва гидроэлектр станциялари каби экологик тоза манбалардан ишлаб чиқарилган электр энергиясини бошқа давлатларга экспорт қилади. Бунинг учун биринчи навбатда Каспий денгизи остидан юқори вольтли кабель ётқизиш режалаштирилган.

Шу билан бирга, ҚР Энергетика вазири Алмасадам Сатқалиев Каспий денгизи туби орқали кабель ётқизиш лойиҳасини амалга ошириш мақсадида техник топшириқ ишлаб чиқилганини таъкидлади.

“Техник вазифа доирасида халқаро узатиш йўлакларини ривожлантириш ва яшил энергияни Европа Иттифоқи мамлакатларига сотиш бўйича лойиҳа бизнес-модели ишлаб чиқилади. Юқоридагилардан келиб чиқиб, уч мамлакат энергетика вазирликлари ўзларининг энергетика тизимларини улаш бўйича ҳамкорлик меморандумини имзоладилар”, — деди Алмасадам Сатқалиев.

Вазирлик бошлиғининг маълум қилишича, айни пайтда мазкур лойиҳани амалга оширишнинг асосий механизмлари барча томонлар билан муҳокама қилинган ва келишилган.