Қозоғистон Урумчида савдо ваколатхонасини очади
ASTANA. Kazinform – ҚР Савдо ва интеграция вазири Арман Шаққалиев ХКП Марказий Қўмитаси Сиёсий бюроси аъзоси, ШУАР партия қўмитаси котиби Ма Синжуй ва ШУАР раҳбари Эркин Туниёз билан учрашувда Қозоғистон-Хитой савдо ҳамкорлигини мустаҳкамлаш ва Урумчи шаҳрида савдо ваколатхонасини очиш масалаларини муҳокама қилди, деб хабар беради Каzinform.
2023 йилда Қозоғистон ва Хитой ўртасидаги товар айирбошлаш ҳажми 31,5 миллиард долларга етди, унинг асосий қисми Хитойга тўғри келди – 64 фоиздан ортиғи ёки 20,3 миллиард доллар. Бугунги кунда Хитой Қозоғистоннинг асосий ташқи савдо шеригига айланди ва савдо операциялари ўсишда давом этмоқда.
Икки давлат раҳбарлари ўтган йилни дўстлик ва ҳамкорликнинг “олтин 30 йиллиги” деб атади ва муносабатларни мустаҳкамлаш бўйича режани қабул қилди. Келгуси йилларда Қозоғистон ва Хитой савдо-иқтисодий алоқаларини кенгайтириш, бизнес шароитлари ва маҳсулот сифати стандартларини яхшилашни давом эттиради.
Ма Синжуй қўшма режа муваффақиятли амалга оширилишига ишонч билдирди. Ҳамкорликнинг янги даври турли соҳалар, жумладан, транзит ва туризм соҳаларидаги алоқаларни ривожлантиришга туртки бўлишини таъкидлади.
Қозоғистон Савдо ва интеграция вазири, айниқса, минтақавий стратегиялар контекстида экспортга янгича ёндашувлар муҳимлигини таъкидлади. У қозоғистонлик ишлаб чиқарувчиларнинг яқин йилларда маҳсулот экспортини оширишга тайёрлигини маълум қилди.
— Ҳар бир вилоят билан аниқ мақсадли ишлар олиб борилмоқда, устувор йўналишлардаги лойиҳаларга товар айирбошлаш ва сармояларни жалб этиш бўйича ҳамкорликда чора-тадбирлар режаси ишлаб чиқилмоқда. Қозоғистон ишбилармонлари Хитой бозорига маҳсулот етказиб беришга тобора кўпроқ қизиқиш билдирмоқда. Биз ХХР раҳбариятининг маҳаллий товарларни ХХРга олиб чиқиш масалаларини ҳал этишда қўллаб-қувватлаётганини жуда қадрлаймиз, – деди Қозоғистон Савдо ва интеграция вазири музокаралар чоғида.
Арман Шаққалиевнинг айтишича, маҳаллий ишлаб чиқарувчилар яқин икки йилда 250 минг тоннадан ортиқ ўсимлик ёғи ва бошқа маҳсулотларни экспорт қилишга тайёр.
— Мамлакатларимиз ўртасидаги, хусусан, ШУАР билан товар айирбошлаш ҳажмини ошириш учун Давлат раҳбари Урумчи шаҳрида савдо ваколатхонасини очиш бўйича топшириқ берди. Мазкур ваколатхона фаолиятига вазирлик тасарруфидаги QazTrade ташкилоти жалб этилади. Келажакда у ишлаб чиқарувчиларимиз ва маҳсулот харид қилишдан манфаатдор бўлган Шинжон компаниялари ўртасида ўтказгичга айланади, — деди Қозоғистон савдо ва интеграция вазири.
Арман Шаққалиев Астана шаҳрида бўлиб ўтадиган ШҲТга аъзо давлатлар раҳбарлари кенгашининг июлдаги йиғилиши доирасида Урумчи шаҳрида Қозоғистон савдо миссиясининг очилиш маросимини ўтказишни таклиф қилди.
Қозоғистон бизнеси ҳар йили Хитой-Евросиё кўргазмасида иштирок этади. Ўтган йили Қозоғистон стенди ЭКСПО кўргазмасида ўз маҳсулотларини намойиш этган 40 давлат орасида энг яхшиларидан бирига айланди. Кўргазма якунлари бўйича мамлакат корхоналари ўртасида 100 миллион доллардан ортиқ экспорт шартномалари тузилди. Арман Шаққалиев қозоғистонлик тадбиркорларнинг жорий йил 26-30 июнь кунлари Урумчи шаҳрида бўлиб ўтадиган халқаро ЭКСПО кўргазмасида иштирок этишини тасдиқлади.
Учрашувда инвестиция лойиҳалари, жумладан, қурилиш ва қишлоқ хўжалиги маҳсулотларини қайта ишлаш бўйича ҳамкорлик истиқболлари ҳам муҳокама қилинди.
Учрашувнинг якуний қисмида Ма Синжуй июнь ойида Урумчи шаҳрида бўлиб ўтадиган “Хитой-Евроосиё” кўргазмаси доирасида Қозоғистон ва Хитой ўртасида III трансчегаравий ҳамкорлик форуми ўтказилишини маълум қилди ва Қозоғистон томонини ушбу учрашувда иштирок этишга таклиф қилди.
