Қозоғистон ҳудудларидан Туркияга 115 тонна моддий гуманитар ёрдам ва 35 миллион тенге йиғилди
ҚР Ахборот ва жамиятни ривожлантириш вазирлигининг хабар беришича, мамлакатнинг барча ҳудудларида зарур маҳсулотларни қабул қилиш ва саралаш пунктлари ташкил этилган. Фаол фуқаролар, кўнгиллилар ёрдамнинг ҳисобини юритадилар, барча йиғилган нарсаларни саралайди ва қадоқлайди.
Йиғилган материаллар автомобилда Туркия Республикаси элчихоналари ва консулликларига етказилади.
«13 феврал ҳолатига кўра, ҳудудларда 115 тонна инсонпарварлик ёрдами йиғилди (Алмати шаҳри – 4 тонна, Алмати вилояти – 68 тонна, Туркистон вилояти – 25 тонна, Чимкент – 50 тонна, Ақмола, Ғарбий Қозоғистон, Қарағанди, Павлодар, Шимолий Қозоғистон, Шарқий Қозоғистон, Улитау вилоятлари – 3 тонна), шундан 75 тоннаси (Туркистон вилояти ва Чимкент шаҳри) Туркияга жўнатилди, 32 миллион тенге йиғилиб, тўғридан-тўғри Аfad фондига ўтказилди», — деб хабар беради вазирлик.
Бундан ташқари, қозоғистонликлар 114 та миллий уйларини (ўтов)жўнатишди. Умуман олганда, одамлар сафарбар бўлмоқда, блогерлар, тадбиркорлар, кўнгиллилар ва жамоат арбоблари, журналистлар, шунчаки фаол фуқаролар ўз ҳиссаларини қўшмоқда.
«Масалан, ёш тадбиркор ва блогерлар Асхат Нурлибаев ва Айдос Шайхислом Instagramдаги саҳифаларида ёрдам ташкил этишда фаоллик кўрсатмоқда, Жамбил вилоятидаги кўнгиллилар 17 та фура ёрдам йиғиб, Алмати консуллигига жўнатмоқчи.
Ўз навбатида Қозоғистондаги Миллий кўнгиллилар тармоғи ва Қизил ярим ой жамияти ҳам салмоқли ишларни ташкил этмоқда. Кўнгиллилар ёрдамнинг биринчи босқичини якунладилар», — дейилади хабарда.
Барча ишлар Туркия Республикасининг Қозоғистондаги элчихонаси билан ҳамкорликда амалга оширилмоқда.
