Қозоғистон Тожикистон бозорига дон етказиб беришни кўпайтиради
ASTANA. Kazinform - Қишлоқ хўжалиги вазири Айдарбек Сапаров Тожикистон Республикасининг Қозоғистондаги Фавқулодда ва мухтор элчиси Хайрулло Ибодзода, шунингдек, Тожикистон аграр бизнеси вакиллари билан учрашув ўтказди, деб хабар беради Kazinform агентлиги.
Томонлар Қозоғистон ғалласини Тожикистонга ўзаро манфаатли шартларда етказиб беришни кўпайтириш истиқболларини, дон бозори бўйича ахборот алмашиш масалаларини, қишлоқ хўжалиги соҳасида икки томонлама ҳамкорликни янада кенгайтириш йўлларини муҳокама қилдилар.
Музокараларнинг асосий мавзуси Қозоғистондан Тожикистонга ғалла экспорти ҳажмини ошириш масаласи бўлди.
Тожикистон анъанавий равишда Қозоғистон дон маҳсулотлари учун асосий бозорлардан бири ҳисобланади. Мамлакатга йилига ўртача 1 миллион тоннага яқин дон етказиб бериляпти.
“Қозоғистон темир йўли” МК маълумотларига кўра, 2024 йил охирига келиб, Тожикистонга дон экспорти ҳажми 1,3 миллион тоннани ташкил этди, бу 2023 йилга нисбатан 20 фоизга кўпдир. 2024 йил сентябридан 2025 йил июнигача бўлган даврда 1,2 миллион тонна ғалла экспорт қилинган, бу ўтган йилнинг шу даврига нисбатан бир ярим баравар (823 минг тонна) кўпдир.
Айдарбек Сапаров экспортни кенгайтириш масалаларида ҳар томонлама ёрдам кўрсатишга тайёрлигини тасдиқлади ва Қозоғистон Тожикистон билан агросаноат мажмуасида шерикликни мустаҳкамлашдан манфаатдор эканини таъкидлади.
