Қозоғистон орқали 13 та халқаро транспорт коридори ўтади
ASTANA. Kazinform — Қозоғистон ҳудуди орқали 13 та халқаро транспорт коридори ўтади. Сўнгги 15 йил давомида мамлакатнинг транспорт-логистика инфратузилмасини ривожлантиришга 35 миллиард АҚШ долларидан ортиқ инвестиция киритилди.
Қозоғистон Республикаси транспорт вазири ўринбосари Мақсат Қалиақпаров Пекин шаҳрида бўлиб ўтган Барқарор транспорт бўйича глобал форумда иштирок этди. Тадбирда ҳукуматлар, транспорт соҳасидаги ваколатли органлар, халқаро ташкилотларнинг юқори лавозимли вакиллари, экспертлар ва бизнес ҳамжамияти вакиллари йиғилиб, халқаро транспорт алоқаларини ривожлантириш, логистика занжирларининг барқарорлигини таъминлаш, рақамлаштириш ва янги технологияларни жорий этиш масалаларини муҳокама қилди.
Ўз нутқида Мақсат Қалиақпаров Қозоғистон учун транспорт-логистика мажмуасининг стратегик аҳамиятини таъкидлаб, мамлакатнинг Хитой, Марказий Осиё, Каспийбўйи минтақаси ва Европа ўртасидаги асосий қуруқлик транзит бўғинларидан бири сифатидаги ролига тўхталди.
“Қозоғистон ҳудуди орқали 13 та халқаро транспорт коридори ўтади. Сўнгги 15 йилда мамлакатнинг транспорт-логистика инфратузилмасини ривожлантиришга 35 миллиард АҚШ долларидан ортиқ инвестиция киритилди”, — дейилади Транспорт вазирлиги хабарида.
Маърузанинг асосий йўналишларидан бири Транскаспий халқаро транспорт йўналишини (ТХТЙ) ривожлантириш масаласига бағишланди. Сўнгги беш йилда ТХТЙ орқали амалга оширилаётган транзит ҳажми 3,5 баробарга ошди. 2025 йилда контейнер ташиш ҳажми 77 минг ДФЭга етди. 2029 йилга келиб транзит контейнер ташувлари ҳажмини 300 минг ДФЭга етказиш режалаштирилган.
Форумнинг муҳим амалий натижаларидан бири — Барқарор транспорт соҳасида глобал ривожланиш ва ҳамкорлик ташаббусининг асосий ҳужжатини қабул қилиш бўлди. Ҳужжат барқарор транспорт соҳасида давлатлар, халқаро ташкилотлар, молия институтлари, бизнес, илмий ва таълим муассасалари ўртасидаги ҳамкорлик учун кўп томонлама платформани шакллантиради.
Вазири ўринбосари Қозоғистон транспорт тизимларини халқаро даражада янада рақамли интеграция қилиш, инфратузилмавий лойиҳаларни ўзаро боғлаш ва Осиё ҳамда Европа ўртасида тўсиқсиз транспорт йўналишларини шакллантириш учун шароит яратишдан манфаатдор эканини таъкидлади.
Қозоғистон халқаро транспорт коридорларини ривожлантириш, рақамли ечимларни жорий этиш, инвестициялар ва технологияларни жалб этиш, шунингдек, Евроосиёнинг транспорт-логистика тизими барқарорлиги ва рақобатбардошлигини ошириш йўналишларида Хитой ва бошқа ҳамкор давлатлар билан ҳамкорликни давом эттиради.
