Қозоғистон Кипр билан парламентлараро ҳамкорликни ривожлантиришдан манфаатдор – Маулен Ашимбаев
ASTANA. Kazinform – ҚР Парламенти Сенати Раиси Маулен Ашимбаев Кипр Республикаси Ташқи ишлар вазири Константинос Комбос билан учрашди. Суҳбат чоғида икки мамлакат ўртасидаги ҳамкорликни янада мустаҳкамлаш ва шериклик муносабатларини кенгайтириш масалалари муҳокама қилинди.
Сенат раиси ўз нутқида Константинос Комбосни ва бутун Кипр халқини ушбу мамлакатнинг миллий байрами билан табриклади. У, шунингдек, Кипр Қозоғистоннинг Европадаги муҳим сиёсий ва иқтисодий ҳамкорларидан бири эканлигини таъкидлаб, бу давлатнинг жадал ривожланишига эътибор қаратди.
Маулен Ашимбаев, шунингдек, ўтган йиллар давомида Қозоғистон ва Кипр ўртасида ҳурмат ва ишончга асосланган ўзаро ҳамкорликнинг мустаҳкам пойдевори шаклланганини таъкидлади. Учрашувда икки давлат ўртасидаги парламентлараро алоқаларни янада мустаҳкамлаш муҳимлиги таъкидланди.
“Ўзаро ишончга асосланган олий даражадаги мулоқот муносабатларимизнинг барча йўналишларда ошишига катта таъсир кўрсатди. Астанада Кипр элчихонасини очиш қарорини олқишлаймиз. Бундай қадам икки томонлама алоқаларни мустаҳкамлаб, муносабатларимизни янги босқичга олиб чиқишига ишонамиз. Қозоғистон Парламенти ҳам Кипр билан парламентлараро ҳамкорликни ривожлантиришдан манфаатдор. Парламентимизнинг ҳар иккала палатасида Кипр қонун чиқарувчи органи билан дўстлик гуруҳлари мавжуд. Ўша гуруҳларнинг салоҳиятидан самарали фойдаланиш муҳим”, – деди Маулен Ашимбаев.
Шу билан бирга, Сенат Спикери Қозоғистонда Давлат раҳбари Қасим-Жомарт Тоқаев ташаббуси билан амалга оширилаётган кенг кўламли сиёсий ва ижтимоий-иқтисодий ислоҳотлар самараларини таъкидлади. Шунингдек, Константинос Комбосга янги иқтисодий модельга ўтиш учун ташланган қадамлар ҳақида гапирди.
Ўз навбатида, Кипр Ташқи ишлар вазири Қозоғистонда амалга оширилаётган ижтимоий-сиёсий ўзгаришларни юқори баҳолаб, икки давлат ўртасидаги ҳамкорликни, жумладан, парламентлараро ҳамкорликни янада мустаҳкамлашдан манфаатдор эканлигини билдирди.
Бундан ташқари, учрашувда савдо-иқтисодий, сармоявий ва маданий-гуманитар алоқаларни кенгайтириш масалалари муҳокама қилинди.
