Қозоғистон қардош халқлар ўртасидаги ҳамкорликни кенгайтириш ниятида
ASTANA. Kazinform – ҚР Парламенти Сенати раиси Маулен Ашимбаев Туркия Республикасининг Қозоғистондаги Фавқулодда ва Мухтор Элчиси Мустафо Капужу билан учрашди. Суҳбат чоғида икки мамлакат ўртасидаги ҳамкорликни янада мустаҳкамлаш ва стратегик шерикликни кенгайтириш масалалари муҳокама қилинди. Бу ҳақда ҚР Парламенти Сенати матбуот хизмати маълум қилди.
Маулен Ашимбаев ўз нутқида Мустафо Капужуни ўтган йили Туркия Республикаси ташкил топганининг 100 йиллиги билан табриклади. Унинг айтишича, Қозоғистоннинг Туркия билан ҳамкорлиги чуқур илдизларга эга, ҳар икки давлат ҳам маданий ва тарихий қадриятларга эга. Палата Спикери, шунингдек, Туркия билан алоқалар мамлакат ташқи сиёсатининг муҳим йўналишларидан бири бўлиб, ўзаро ҳар томонлама стратегик шериклик муносабатлари давлат раҳбарлари ўртасидаги дўстона ва ҳурмат-эҳтиром муносабатлари туфайли юксак даражада мустаҳкамланаётганини алоҳида таъкидлади.
“Биз Туркия Буюк Миллат Мажлиси билан ҳамкорликни ривожлантириш ва қонунчилик соҳасида тажриба алмашишдан манфаатдормиз. Икки давлат парламентларида фаолият юритаётган “Қозоғистон-Туркия” парламентлараро дўстлик гуруҳлари салоҳиятини янада ривожлантириш муҳим аҳамиятга эга. Туркий давлатлар Парламент Ассамблеяси ҳам туркий тилли давлатлар ўртасидаги маданий, иқтисодий ва гуманитар соҳалардаги алоқаларни мустаҳкамлашга катта ҳисса қўшмоқда. Сенат депутатлари ТуркПА комиссиялари фаолияти ва унинг доирасида ўтказиладиган бошқа тадбирларда фаол иштирок этмоқда”, – деди Маулен Ашимбаев.
Учрашувда Туркий давлатлар ташкилотининг Астана шаҳрида бўлиб ўтган 10-саммитида тилга олинган қардош халқлар ҳамкорлигини оширишга қаратилган устувор вазифалар ҳақида ҳам сўз борди.
“Қозоғистон Президенти Қасим-Жомарт Кемелули Тоқаев Туркий давлатлар ташкилотининг 10-саммитида таъкидлаганидек, мамлакатимизнинг Ташкилотга раислиги «TURKTIME!» Шиори билан ўтади. Ушбу концепцияда биринчи навбатдаги устуворликлар белгиланган. Бизнинг умумий мақсадимиз – ўзаро ишонч ва тарихий илдизларга асосланган бирдамлигимизни асраб-авайлаш ва мустаҳкамлашдир. Ишонамизки, Астана саммити мамлакатларимиз ўртасидаги сиёсий, иқтисодий ва маданий ҳамкорликни янги босқичга кўтаришга хизмат қилди”, – деди Маулен Ашимбаев. Шунингдек у Қозоғистон Парламенти Сенати икки давлат ўртасидаги муносабатларни янада мустаҳкамлаш бўйича тегишли ишларни давом эттиришини таъкидлади.
Бундан ташқари, Сенат Раиси Қозоғистонда Давлат раҳбари ташаббуси билан амалга оширилаётган ижтимоий-сиёсий ва иқтисодий ислоҳотларнинг бориши ва палатанинг қонун ижодкорлиги фаолиятига эътибор қаратди.
Мустафо Капужу, ўз навбатида, Қозоғистонда амалга оширилаётган ислоҳотларни юқори баҳолаб, туркий халқлар ўртасидаги ўзаро ҳамкорликни янада ошириш муҳимлигига эътибор қаратди.
