Қозоғистон илмий ходимлари Сингапурда ўз билимларини оширадилар
ALMATY. Kazinform – Қозоғистонда илм-фанга ажратилаётган маблағлар доимий равишда ошиб бормоқда. Сўнгги йилларда малакали кадрлар тайёрлаш учун ажратилаётган грантлар сони бир ярим баробар ошди. Бу ҳақда Президент Қасим-Жомарт Тоқаев олимлар билан учрашувда маълум қилди.
“Қозоғистонда дунёнинг 12 та нуфузли олий ўқув юртларининг филиаллари фаолият кўрсатмоқда. Тез орада яна бир нечтаси очилади. Тадқиқот билан шуғулланадиган университетлар кўпаймоқда. Технопарклар, муҳандислик марказлари очилмоқда. Ҳар йили 500 нафар олим хорижда стажировкадан ўтади. Вазирлик ёш олимларга минглаб грантлар ажратмоқда. Ўйлайманки, буларнинг барчаси илм-фан ривожига ижобий таъсир кўрсатади”, – деди Президент.
Давлат раҳбари хорижга сафарлари чоғида олимлар билан тез-тез учрашиб туришини, уларни қозоғистонлик олимлар билан яқин алоқалар ўрнатишга таклиф этишини таъкидлади.
“Ўтган ҳафтада у ерда сингапурлик олимлар, олий таълим муассасалари ректорлари билан махсус учрашув ўтказдим. Энди Сингапурда илмий кадрларимизни тайёрламоқчимиз. Умуман олганда, Сингапур каби илғор иқтисодли давлатлардан кўп нарсани ўрганиш мумкин.
Постиндустриал даврда дунёга очиқ бўлиш ва инновацияларга интилиш ҳар қандай давлат муваффақиятининг ўта муҳим омили саналади. Шунинг учун биз илғор халқаро тажрибани синчиклаб ўрганамиз ва унга амал қиламиз. Биз илғор технологиялар ва ғояларни жорий қиламиз”, – деди Қасим-Жомарт Тоқаев.
Мувозанатли ва конструктив ташқи сиёсат юритган ҳолда барча манфаатдор давлатлар билан тенг ҳуқуқли ва ўзаро манфаатли муносабатлар ўрнатамиз, деди Президент.
“Биз ҳамкорликка алоҳида эътибор қаратамиз. Биз тизимли равишда бизни ажратиб турадиган ва ишончни бузадиган девор қуриш учун эмас, балки ҳамкорлик ва ўзаро тушунишга етакловчи кўприк қуриш учун ишлаймиз. Бироқ низо ва урушлар давом этаётган ҳудудларда бундай конструктив сиёсатни олиб бориш жуда қийин. Бу қатъият ва сабр-тоқатни талаб қилади.
Дипломатия ва мулоқот йўлидан бориб, биз баркамол ва адолатли халқаро тузилма яратиш тарафдоримиз. Биз мамлакатда кенг қамровли ислоҳотларни амалга оширмоқдамиз. Шунингдек, биз ҳеч қандай сиёсий вазият таъсирига тушмасдан, ўзгалар фикрига эргашмасдан, ўз миллий манфаатларимизга қаратилган мутаносиб ташқи сиёсат юритмоқдамиз.
Давлат раҳбари сифатида мен учун истиқлол қадриятларини асраб-авайлаш, халқ фаровонлигини юксалтириш, мамлакатимизни жадал ривожлантириш асосий вазифадир. Мен ҳар доим бу асосий тамойилни таъкидлайман. Биз беш йил ичида сиёсат ва иқтисодиётдан тортиб, маданият ва таълимгача бўлган барча муҳим соҳаларда кенг кўламли ва институционал ўзгаришларни амалга оширишга муваффақ бўлдик. Энг муҳими, халқнинг реал ўзгаришларга ишончини уйғотдик. Биз ўз йўлимиздан қайтмаймиз. Биз амалга оширган барча ислоҳотларимизни ҳаётга татбиқ этишда давом этамиз”, – деди Президент.
Аввал хабар қилинганидек, Президент Қасим-Жомарт Тоқаев олимлар билан учрашди.
