Қозоғистон ҳудудларида иситиш мавсуми қачон бошланиши маълум қилинди
ASTANA. Kazinform — Қозоғистоннинг шимолий ва шарқий ҳудудларида иситиш мавсуми 1 октябрга қадар бошланиши режалаштирилган. Муддат об-ҳаво шароитларига боғлиқ бўлади, деб хабар беради Кazinform мухбири.
ҚР Энергетика вазири Ерлан Ақкенженов бу ҳақда Ҳукумат йиғилишида мамлакатнинг куз-қиш даврига тайёргарлик кўриши ҳақида ҳисобот берди.
— Иситиш мавсуми Павлодар вилоятида 14 сентябрь куни бошланди. Об-ҳаво шароитларига қараб, шимолий ва шарқий ҳудудларда 1 октябрга қадар бошланиши кутилмоқда, — деди Ерлан Ақкенженов.
Унинг сўзларига кўра, энергия манбаларида 4,9 миллион тонна кўмир ва 127 минг тонна ёқилғи мазут захираси тўпланган. Бугунги кунга қадар тўртта энергия блоки, 30 та қозонхона ва 19 та турбина таъмирланди.
17 минг километрлик электр узатиш линияларини модернизация қилиш ҳам якунланди ва яна 9 та нимстанцияда ишлар якуний босқичда.
Мамлакат бўйлаб иситиш тармоқларининг тайёрлиги 97% га баҳоланмоқда. Таъмирлаш режалаштирилган 377 километрлик тармоқлардан 366 километрида ишлар бажарилди.
Шу билан бирга, Улитау, Абай, Шимолий Қозоғистон ва Ақмола вилоятларидаги алоҳида объектлар алоҳида назорат остида қолмоқда. Сатпаевда иситиш магистралини реконструкция қилиш ишлари якунланди ва ҳозирда тармоқларни ювиш ва босим синовлари олиб борилмоқда.
Петропавлда магистрал линияларнинг тайёрлиги 95% ни ташкил этади ва ишлар ҳафта охирига қадар якунланиши режалаштирилган. Степногорскда бу кўрсаткич 76% га етди ва 25 сентябрга қадар якунланиши режалаштирилган.
Семейда учта лойиҳа бўйича ишлар 70% га бажарилди. Насослар ва иссиқлик алмаштиргичларни етказиб бериш 26 сентябрга қадар кутилмоқда.
Эслатиб ўтамиз, Ҳукумат йиғилишида полиция йўлларда ўртача тезликни назорат қилишни кучайтириши маълум қилинди.
