Қозоғистон-Хитой инвестиция жамғармаси тузилади

Қасим-Жомарт Тоқаев бундай лойиҳаларни амалга ошириш учун тегишли молиявий тузилма зарурлигини эслатди. Президент форум иштирокчиларига бир неча йилдан буён муваффақиятли фаолият юритиб келаётган «Астана» халқаро молия маркази ҳақида сўзлаб берди.

“АХММ ва дунёнинг етакчи молия марказларидан бири ҳисобланган Гонконг ўртасидаги яқин ҳамкорлик, шубҳасиз, кўплаб имкониятларга йўл очади. Сентябрь ойи бошида «Самруқ-Қазна» жамғармаси Марказий Осиё ва ШҲТ давлатлари эмитентлари орасида биринчи бўлиб Хитойнинг банклараро бозорига кирди. Умумий қиймати уч миллиард юандан (450 миллион доллардан) ортиқ бўлган панда-облигацияларни чиқарди. Умуман, Қозоғистон инвестиция жараёнини имкон қадар қисқа, шаффоф ва технологик жиҳатдан илғор тарзда ташкил этиш ниятида. Kazakh Invest миллий компанияси ҳузурида қозоқ-хитой инвестиция жамғармасини ташкил этиш тўғрисидаги келишувни имзолаш — бу йўналишдаги муҳим қадамлардан биридир”, — деди Давлат раҳбари.

Қасим-Жомарт Тоқаевнинг фикрича, қозоқ-хитой инвестиция форуми икки мамлакат ишбилармон доиралари ўртасидаги тўғридан-тўғри алоқаларни кучайтирувчи доимий майдонга айланиши керак.

“Шунинг учун ушбу форумни «Қозоғистон-Хитой» Алмати инвестиция мулоқоти номи остида ҳар йили сентябрь ойида ўтказишни таклиф қиламан. Умуман, бугун бир қатор аниқ келишувларга эришдик. Бу келишувлар Қозоғистон ва Хитой, шунингдек, бутун Евроосиё қитъасининг барқарор ривожланишига янги туртки беради, деб ишонаман”, — деди Президент.

Ушбу форумда Қасим-Жомарт Тоқаев Қозоғистон Хитой билан абадий дўстлик алоқаларини мустаҳкамлашга алоҳида аҳамият қаратаётганига эътибор қаратди.

“Мамлакатимиз учун бу — ташқи сиёсатдаги энг муҳим мақсадлардан бири. Умумий тарихимизга назар ташласак, Хитой халқи ҳеч қачон халқимизга ҳеч қандай зарар етказмаган. Икки халқ кўп йиллар давомида ўзаро ҳурмат ва қўллаб-қувватлаш муҳитида бирга яшаб келган. Ҳозирги беқарор ва ноаниқ замонда эса Қозоғистон ва Хитой ишончли ҳамкорлар сифатида елкама-елка ҳаракат қилиб, турли хил хавф-хатарларга биргаликда қарши туриши керак. Хитой тилида шундай мазмунли мақол бор: 人心齐，泰山移,яъни: «Биз барчамиз бир бутун бўлсак, баланд Тайшань тоғини ҳам жойидан қўзғатишимиз мумкин». Қозоғистон ва Хитой — икки дўст, қўшни давлат сифатида ҳар бир ишни муваффақиятли амалга оширади, деб ишонаман”, — дея якунлади Давлат раҳбари.