Қозоғистон ҳақидаги энг ноёб Гиннес рекордлари
ASTANA. Kazinform – Бугун Гиннеснинг рекордлар куни. Шу муносабат билан Kazinform Қозоғистон ҳақида расман рўйхатга олинган энг ноёб рекордлар шарҳини тақдим этади.
Денгизга тўғридан-тўғри кириш имкони бўлмаган энг катта давлат
Маълумки, Қозоғистон ҳудуди бўйича дунёда тўққизинчи ўринда туради, унинг ҳудуди 2,7 миллион квадрат километрни ташкил этади. Мамлакат Гиннеснинг рекордлар китобига шундай ҳудудга эга бўлган энг йирик денгизга чиқмайдиган давлат сифатида қайд этилган. Умуман Қозоғистон Россия, Хитой, Ўзбекистон, Қирғизистон ва Туркманистон билан чегарадош. Бироқ, дунёдаги энг катта кўл ҳисобланган Каспий денгизининг бир қисми Қозоғистон ҳудудига киради.
Қозоғистондаги қуруқ даштнинг майдони 804,5 минг квадрат километрни ташкил қилади. Шу боис мамлакат дунёдаги энг катта қуруқ даштга эга мамлакат сифатида танилган.
Боксдаги "қозоқ вазни"
2016 йилда Бразилиянинг Рио-де-Жанейро шаҳрида бўлиб ўтган ёзги Олимпия ўйинларида иштирок этган боксчи Данияр Елеусинов 69 килограмм вазн тоифасида олтин медални қўлга киритди. Шу тариқа у 2004 йилда Бахтияр Артаев, 2008 йилда Бахит Сарсекбаев, 2008 йилда Серик Сапиев муваффақиятларини такрорлади. Кетма-кет 4 та Олимпиадада бир хил вазнда 4 та “олтин” қўлга киритган қозоғистонлик боксчилар муваффақиятидан сўнг, спорт мутахассислари боксда 69 кг вазнни “қозоқ вазни” деб аташди. Бу ҳам Қозоғистонда расман рўйхатга олинган ноёб рекордлардан биридир.
Блиц мусобақасида энг ёш жаҳон чемпиони бўлган шахматчи Бибисара Асаубаева 2021 йилда Польша пойтахтида аёллар ўртасидаги блиц баҳсларида жаҳон чемпиони бўлганида 17 ёшу 307 кунлик эди. Шу тариқа, у ушбу турдаги мусобақада энг ёш қизлар ўртасида жаҳон чемпиони бўлди.
Энг катта бўғирсоқ
2014 йилда Алматидаги “Эра” телеканали (ҳозирги 7-канал) оғирлиги 856 килограмм бўлган дунёдаги энг катта бўғирсоқ пишириб, одамларнинг эътиборини тортди. Бу рекорд 2024 йилда яна янгиланди. Қостанай вилоятида ўтказилган «Бўғирсоқ Fest» фестивалида 2 минг 339 килограмм 650 грамм бўғирсоқ пиширилди.
Энг кўп миллатли оркестр
2022 йил 6 сентябрь куни Астана шаҳридаги Тинчлик ва тотувлик саройида 51 миллат вакиллари оркестр таркибида мусиқа чалиб, навбатдаги махсус рекорд ўрнатди. Бу Қозоғистон халқининг бирлигини кўрсатиш мақсадида ташкил этилган тадбир эди.
Тунги чанғи спорти учун энг баланд чанғи дараси
Шимбулоқ тоғ-чанғи дараси тунги чанғи спорти учун дунёдаги энг баланд чанғи дараси ҳисобланади – у денгиз сатҳидан 2300 метр баландликда жойлашган.
