Қозоғистон экспорт сиёсатини кучайтиради
ASTANA. Kazinform - Қозоғистон Бирлашган Араб Амирликлари билан хизматлар ва сармояларнинг эркин савдоси тўғрисида битим тузишни режалаштирмоқда.
Бу ҳақда ҚР Савдо ва интеграция вазирлигининг кенгайтирилган ҳайъат йиғилишида Арман Шаққалиев маълум қилди.
Унга кўра, вазирликка экспортни қўллаб-қувватлашнинг ягона ойнасини яратиш, экспортни рағбатлантириш учун зарур маблағларни жамлаш вазифаси юкланган.
“Ўтган йил январь ойида кенг кўламли суғурта ва молиявий қўллаб-қувватлаш чора-тадбирларини амалга оширишга қаратилган “Экспорт-кредит агентлиги тўғрисида”ги қонун қабул қилинди. Бу йўналишда Қозоғистон экспорт-кредит агентлиги қўллаб-қувватлаш воситалари кўламини кенгайтирди. Субсидияларга муқобил сифатида кафиллик, экспортдан олдинги ва савдони молиялаштириш воситалари жорий этилди. Транспорт йўлакларини ривожлантиришни ҳисобга олган ҳолда Хитой, Евроосиё иқтисодий иттифоқи, Марказий Осиё, Европа Иттифоқи ва Яқин Шарқ мамлакатлари каби бозорлар белгиланди”, – деди Арман Шаққалиев.
Шунингдек, у ташқи савдо алоқаларини кенгайтириш мақсадида Қозоғистон ва Сингапур ўртасида хизматлар ва сармояларнинг эркин савдоси тўғрисидаги битим ратификация қилинганини маълум қилди.
“Бундан ташқари, Бирлашган Араб Амирликлари билан тўлиқ форматдаги келишув амалга оширилмоқда. Эрон ва Евроосиё иқтисодий иттифоқи доирасида товарларнинг эркин савдоси тўғрисидаги тўлиқ форматдаги келишувни ратификация қилиш якунланди”, - деди вазир.
